بخصوص الصور المسروقه من المدونات والمنتديات

بنات .. بغيت أوجه لكن رساله وهي في نفس الوقت نصيحه لوجه الله

لاحظت في المنتدا كل يوم والثاني وحده تنزل صور رحله أو ملجه أو عرس أو مرات صور يهال وتقول هذي رحلتنا حق المكان الفلاني وهذيلا عيالي وهذي صور ملجتي .. وللأسف الأغلبيه كذابه وماخذه الصور من مدونة ومدونات ومواقع ثانيه .. أنا ما بقول أسامي العضوات هن يعرفن أنفسهن زين ما زين ..

بس حبيت أقول شي واحد .. ليش يعني كل هذا .. إذانج كذبتي على البنات وقلتي إنج ملجتي أو عرستي خلي كذبتج بينج وبين نفسج ماله داعي تنزلين صور من النت وتحطينها فالمنتدا وتقولين هذا فستاني وهذي شبكتي وهذا مادري شو .. وماله داعي تقولين هذي سفرتي وهذيللا عيالي ..

أوكي تبين تكذبين أكذبي محد ماسكنج لكن إنج تكذبين بصور ناس مايعرفون إنج سارقه الصور وحاطتنها في المنتدا على أساس إنها صورج ؟؟؟
عيب والله عيب .. شو بتستفيدين من الشي هذا إنج تثبتين مثلا حق البنات إنج عرستي .. أو تثبتين لهم إنه ريلج مدللنج ويظهرج .. شو بتستفيدين ..

شو بيكون موقفج لو صاحبة الصور هذي سجلت في المنتدا وشافت صورها منزله بإسم عضوه ثانيه .. في رايج شو بيكون موقفها ..
أكيد بتضايج وبتزعل وبتحاول تفضحج وتثبت للبنات إنج كذابه بإنها تحط صور من عندها من الصور الي مانزلتها في النت بس تثبت إنها صاحبة الصور أو المناسبه .. ساعتها إنتي شو بتستفيدين غير إنه الكل يعرف إنج وحده كذابه وما اكتفيتي بالكذب لكنج قمتي وسرقتي صور ما تخصج وعرضتيها على أساس إنها صورج …

نحن مب غبيات .. والمنتديات والمدونات في متناول الجميع .. والصور الي بعض البنات حاطاتنها على أساس إنها صورهن موجوده وأنا وحده من الي شافنها ومب عضوه وحده لا المشكله غنهن كذا عضوه .. والله الود ودي لو أقول النكات نك نك .. بس مب من صفتي التشهير بحد .. وحبيتها تكون نصيحه يكون ماتتكرر ..

أنا ما أعمم .. شي بنات يحطن صورهن الخاصه ولهن كل الشكر على الصراحه والمصداقيه .. بس القصد الصور والمناسبات الوهميه .. تراها زادت عن حدها ؟؟؟؟؟

الحين كل وحده نزلت صور مب صورها نزلتها وخلصت .. ونحن سكتنا مب من غبائنا لا سكتنا بكيفنا .. لكن هذا تنبيه لكل العضوات .. أنا بنفسي إنسانه مدمنة مواقع ومنتديات ومدونات عشان جي كشفت التزييف .. وأقول حق كل وحده بتحط صور في المنتدا مب صورها إني ما بنبها ولا برسلها خاص .. كل الي بسويه هو إني براسل إدارة المنتدا وبحط الرابط الي انأخذت منه الصور وساعتها لإدارة المنتدا الحق في التصرف .. وفيه حل ثاني إني أراسل العضوه الي في المنتدا الي انسرقت منه الصور وأخبرها بالي صار ولها حق التصرف ..