يمكن البعض منكم قرى موضوعي هذا
http://forum.uaewomen.net/showthread.php?t=886337
بعد هاللي صار حبيت ابين لريلي اني صدق مقدره تغييره ولازم انا بعد بالمقابل اتغيرله …
خلوني اخبركم عن نفسي قبل
في الفتره الاخيره يمكن سنه اهملت نفسي شويه بسبب ضغوطات الحياة وكنت مخليه كل اهتمامي البيت والعيال والريل …
طبعا احمد ربي ومب ندمانه لانه عيالي وريلي كل شي في حياتي
بس الحينه فكرت افضي نفسي وارد اهتم بعمري اكثر لهالسبب قررت اسوي make over
اول خطوه سرت سويت تبييض لضروسي اللي كانوا عقدة حياتي لانه في كل حمل كانوا ضروسي ينكسرون لدرجه فظيعه ونص ضروسي تركيب وحشوات والسبب اني مااشرب الحليب ولا منتجات الحليب ..
اول نصيحه لكل الحوامل علشان ما يعانون مثلي كثروووا من البيض والحليب والالبان والجبن علشان تحافظون على صحة العظام والاسنان وهن اهم شيئين في حياتج انا الحينه عرفت قدر هالشي
المهم اول امس دقيت عياده من العيادات واخذت موعد للتبييض وكان السعر شامل التبييض والتنظيف 1550 درهم
اللي بتلوع جبدها لا تكمل ههههههههههه
هني ضروسي قبل التبييض
اول شي يسوونه لج في التبييض هو عملية التنظيف من الجير وهي شويه تعور مثل الوخزات بس عادي تتحملينهن
هني الدكتوره تنظف لي
والتنظيف ياخذ وقت تقريبا ربع ساعه
بعدها تحط لج جل على اللثه وهالجل وظيفته انه يحمي لثتج من اشعة الليزر لانه الليزر بيحرق اللثه لو يت عليه
هني تحط الجل
وخلاف تحط شرات الضوء على الجل علشان ينشف
وطبعا بتحط لج قطن وبلاوي علشان تغطي منطقة الفم كلها وما يظهر غير ضروسج
عقب تبدا تحط السايل المبيض على الضروس
بعدها بتسلط الليزر على الضروس
طبعا يباله من نص ساعه الى 40 دقيقه على حسب حساسية الضرس
يعني انا حطته لي 3 مرات كل مره تنظف السايل وتشوف درجة البياض وترد تحطه مره ثانيه
لين وصلت لدرجه خلاص حسيت بكهرباء في ضروسي وهذا معناته خلاص الضروس ما تتحمل اكثر
وهاي النتيجه بعد التبييض
قبل
بعد
عقب تعطيج جل تستعملينه مره في الاسبوع في البيت سووري نسيت اصوره
الممنوع اول 48 ساعه اي شي ملون
صالونه-منبهات-بيبسي -حلويات-
فقط تاكلين الابيض
يعني عيش-خبز-جبن-حليب
العصاير ممنوعه المسموح فقط العصير الطبيعي اللي تسوينه في البيت فقط فقط
الاعراض
على طول اول ساعتين بتحسين بنغزات مثل الكهرباء في ضروسج بس تروح وترد وكل شويه تخف
انا عني اخذت بنادول وخلاص الحمدلله ما حسيت بشي
اليوم الثاني احس بكهرباء تحت وين اللثه بس خفيييييييف وعادي
تقول الدكتوره الافضل نستعمل سنسوداين للاسنان الحساسه وما بنحس بشي
بس انا لاني رديت وكنت تعبانه رقدت ونسيت اشتري …….
الرضاااء:
عن نفسي مب راضيه عن النتيجه لانه اللي بالي كان غير كنت ابغي بياض اكثر بس المشكله في ضروسي مب في العياده لانه مثل ما قلت نص ضروسي حشوات والتبييض ما يغير لون الحشوات
لهالسبب الحينه مقرره اسير عيادة ابتسامة هوليوود اشوف لو يقدرون يشوفون لي حل خخخخ
———————
عقب ما خلصت من التبييض سرت سويت ليزر للوجه والرقبه
انا من النوع اللي شعرانيه وااااااااااااااااااااايد كل اسبوعين اشل شعر ويهي ..واحس تعبت نفسيا من هالشي
والليزر بالنسبه لي مفيد وايد وهاي مب اول مره اسويها وعادي يكمل عندي شهرين او ثلاث لين الشعر يظهر بس ما كنت استمر قبل الحينه قررت اني استمر في جلساتي وسعر الجلسه 500 درهم
هيه نسيت اقول في العياده اللي انا اسوي الليزر ما يشلون الشعر بالموس ودايركت يسوون ليزر وانا في نظري اشوف هالشي احسن لانه شفت بنات يسوون ليزر والمنطقه لونها متغير بسبة الموس
قبل
بعد
بس براويكم شي من قريب تشوفون شي شعر بعده وهالشعر روحه بيطيح وعقب اسبوع لازم اردلهم لجلسة الرتوش يعني الباقي اللي ما طاح يردون يسوون له ليزر وتكون مجانيه
—————————–
خلاف سرت بوادي مووول اشتريت لي قمصان وبلاوي لانه كل ملابسي وقمصاني القديمه بطلعهن ومابغي اي شي قديم عندي وصح وايد محلات مسوين خصومات لين 70% وعندهم سوالف حلوه تستاهل انكم تروحون تشوفون ..
———————————
انزين هاي الحلقه الاولى
في الحلقه القادمه خياطة وتجميل المنطقه الحساسه لوووووول كونوا معي لاخر الستجدات
سواره بي بي ان ههههههههههههههه
———————
بلييييييييييييييز لا تسالوني عن اسامي العيادات لاني مااحب اوصي بمكان انا روحي مب راضيه عنه 100%
بالتوفيق انشالله وتردين عروووسه..الله يخليلج عيالج وريلج
شكرااااااااااااااااا
وننتظر الاجزاء القادمه
يللا الباقيات تشجعن وشاركونا بالاشيا اللي تسوونها
ماشاء الله عليج انتظر الحلقه الثانيه ^^
هذا هو الى لازم ايصير
ان الوحده تهتم فى نفسها وزوجها
موفقه انشاءالله وربى يحقق كل الى فى بالج
ودام مسعاج خير ربى بيوفقج
متابعين للنهايه الى بتكون انشاءالله جميله
يسلموو عالمرووور
ما شاء الله عليج حلوو التغيـــر__ ربي ما يضيع تعبج…
اتريا يديدج الغلا…