الوسم: المجتمع

خواتي انا من تجربتي اللي عشتها مع امي وابوي الله يرحمه كانت دائما تصير المشاكل بس للاسف الوالده ما كانت تعرف تتصرف صح , طبعا بعض الحريم يعتقدون اليهال ما يحسون اسمحولي اقول اللي تفكر بهاي الطريقه انتوا غلطانين العيال يحسوا ويحسوا ويحسوا بالحزن و بالظلم و بالقهر , اللي تقول انا بتحمل الضرب وشرب زوجي و عدم تحمله للمسؤؤليه بس خاطر عيالي , ما فكرتي اختي العزيزه شو تاثير راح يكون على ولدج او بنتج يو يشوفونج تنضربين او تنهانين جدامهم ؟ اختي صدقيني الياهل ما يحس بالامان ويحس بالخوف وكل يوم يخاف و هو يوقف جدام باب البيت وهو راد من المدرسه ويتمنى ما يسمع صراخ امه وابوه عسب ما ينحرج اذا حد من الجيران او عيالهم سمعوا او شافوا, يبغي يرجع من المدرسه ويرتاح كيف راح يرتاح وهو حاس ان جو البيت متوتر وان الامور يمكن توصل حتى للضرب؟ تخيلوا عقب الضرابه يا ترى الياهل راح يقدر يركز في دراسته عقب اي مشكله تصير , الياهل يوم يشوف امهم ما تقدر تدافع عن نفسها وهو ما يقدر يدافع عنها يتمنى ان امه وابوه يتطلقون على باله هاي راح تكون راح بالنسبه لامه وله و يمكن ما يعرف ان هاي راح تعرضهم لمشاكل اخس والسبب ضعف الام.

خواتي صحيح كل بيت في مشاكل بس المشاكل تختلف من بيت لبيت و تذكري انتي محاسبه على هالفقاره عيالج خاواتي لا تضيعين حقوقج وحقوق عيالج بسبب الريل او الاهل او المجتمع , انا صح مش متزوجه بس انا عشت في هالبيئه وكيف كان تاثيرها علي , كانت حياتي مش مثل باقي اليهال لدرجه مع اني كنت صغيره بس كنت اتعب نفسيا وشخصيتي مهزوه .
اختي انا ما اقول اطلبي الطلاق اذا ريلج ما يخاف ربه وظلمج انتي خليج قويه اتخذي ضده الاجراء المناسب ما عليج من اهلج او اهله او المجتمع هذيله ما يعرفون بوضعج انتي ادرى انتي الوحيده اللي تقدرين توقفين الظلم اللي قاعد يصير انتي اللي بس تقدرين الحين تدافعين عن نفسج وعيالج , اللي ظلموج ما خافوا الله انتي ليش تخافين وانتي مظلومه؟ لو هب عشانج عسب عيالج اللي ليل ونهار مخليتهم حجه عسب تتمين في هالبيئه عيل يلا دافعي عنهم كافي العذاب اللي هم فيهم غيري وضعج حسسيهم انج موجوده وانج راح تاخذين حقهم , البلاد فيها قانون والسلاطين ما حطت إلا للشياطين روحي المحكمه وطالبي بحقوقج والله ان في حيرم كل يوم والثاني يجرجرون رياييلهم بالمحاكم بس عسب ينتقمون منهم انا ما اقول انتفمي بس خذي حقج .
اذا الحياه الزوجيه ما فيها تفاهم ومشاركه وحب واحترام ما فيها غير الضرب والاهانات والظلم دائما هذا ما يعتبر زواج و انهاءه هب عيب و انما عين العقل , بعض الخوات للاسف يعرفون ان الزواج اصلن فاشل وللاسف يضيعون عمرهم عسب خايفين من نظرة المجتمع بس عقب 15 او 20 سنه تطلق وهو يطلقها وهي تبكي وتقول انا صبرت وتحملت طيب ليش طلقني ؟ هو من متى كان يحبج ويعزج عسب يتمسك فيج ؟ انتي اللي رضيت بالهشي والحين لقى وحده ثانيه وهو مرتاح معاها.
اختي فكري في شعور عيالج شوي شو احساسهم يوم يشوفون ابوهم او اهل الابو او اهل الام او الزوجه الثانيه وعيالها يسبونج , عنبو حتى الهيال يغلطون وانتي ساكته ليش ؟ لهدرجه عاد ؟ لا لالاالا انتي هب طبيعيه عنبو ما عندج كرامه ؟ شو شعور عيالج يوم يشوفون هالشي والله لو عيالج سبوا حد بيضربوهم بس هم عيالهم يسبونج عادي عندهم هذا دليل ان الاهل نفسهم هب متربيين.
اختي اذا تعرضتي للظلم من الزوج او حرمته او عيالها او من اهله تذكري اذا نتي راضيه بالهعيشه كيفج بس لا تحملين عيالج المسووليه هم مالهم ذنب ولا تقولين بصبر عشانهم , عيالج ما يو لين عندج وقالولج اماه تحملي عشان خاطرنا, صح ولا لا؟ , انتي مسووله عنهم هب هم مسوولين عنج , انتي اكبر منهم وفيج عقل فاستخدمي عقلج واحسبيها صح راح تعرفين مين الكسبان ومين الخسران .

خاوتي انا هب متزوجه ولا متطلقه انا بعدني بنت بس انا اتكلم لاني كنت عايشه بالهوضع وشفت المعاناه
والسموحه

انا بعد عشت في هالظروف لفترة معينة ،، ويوم اتذكر مستواي الدراسي كان متاثر بالاجواء فالبيت ،،
ويوم استوت هدوء والمشاكل انحلت ولله الحمد ،، مستواي الدراسي اتحسن واااااايد وكنت اييب علامات على عكس يوم المشاحنات وسوء التفاهم بين امي وابوي ،،

والحرمة لازم تكون شخصيتها قوية ،،، عشان زوجها يحترمها ،، اما اذا لا عندها شخصية وتكون ذليلة محد بيحترمها وبيدوسون على كرامتها للاسف ،،،

ريل لا يلبي اي طلب من طلباتج ولا يوفي ولا حق من حقوقج كيف انتي تكونين انسانه اكثر عن الخدامة واتذلين عمرج وبالاخير ما تحصلين كلمة شكرا !!!!!

الحرمة اللي تكون في هالموقف لازم تفكر عدل ،،، ما دام الزوج مب قد المسؤولية ،، خليج انتي الحرمة والريال ،
اطلعي اشتغلي واعتمدي على نفسج ويوم المشكلة تتعقد والضرر يكون كبير عقب تقدرين بكل ثقة تطلبين الانفصال
اللي هو يكون الحل المناسب لج ولعيالج ،،،

بتتعبين شهر وشهرين وعقب بتشوفين انج اتخذتي القرار المناسب …