التصنيف: مشكلتي – لكل مشكلة حل

السلام عليكم مشكلتنا ويه أخوي أول شيء نحن بلوش والحمدالله مفتخرين بها شيء بس أخوي متعقد من ها سالفه ونحن حالتنا على قدنا وأخوي طلب منا نخطب له من قبيله معروفه وكلنا قلنا له مايصير ومابيوافقون وماله داعي نحرج أعمارنا بس هو أصرر على الموضوع ورحنا خطبنا والله من بوابة البيت قلت حق أمي نحن بننطرد يعني هو مستواهم المعيشي بطرانين على كل حال دخلنا بيت وأستقبلتنا أم البنت وخلاتها وبناتهم أول شيء تمو يتمصخرون علينا وعلى لبسنا أونه تقليد وغير عن جي يسألونا ماشاء الله تعرفون عربي شراتنا ونحن ونحن وأنهم نسايب كباريه وعوايل وأنه قيمة كعب من كعوبها يشترينا والله شرشحونا وأمي حابسه دمعتها وتطالع الأرض وفرو علينا الحلاوه الى يبناها أمي ردينا بيت وهي مكسوره وخواتي وكلنا نحس بأهانه المهم بعد كل ها أخوي الحين يبانا نخطب له وحده ثانيه تصير للبنت أخوي أنسان يستحي من عمره ويىيد يهينا وأمي المسكينه ماتعرف تقول له لا الحين تقريبا أمي مقتنعه بس أنا وخواتي رافضات بتاخذ عمتي

تمت الموافقة
الكلمة الطيبة صدقة

والله كسرت خاطري امج .. هم الخسرانين فديتج ولا تزعلين نفسج ..والحمد الله انه ما ناسبتوهم لأنه الي يتصرف نفس تصرفاتهم اسمحيلي ما عندهم لا اخلاق ولا تربية ولا دين ولاشي …
واخوج شو ردة فعله اول مرة ؟ ها ما يحس.. يباله حد يشد عليه بالرمسه ..
ذ
الله يرزقه بنت حلال ان شاء الله

استغفر الله العظيم

والزواج قسمه نصيب

اختي اصابعج مب سوى والأغلبية من القبايل تفكيرهم متشابه ما يرضون الا بالقبيلي شراتهم ولازم اخوج يقدر وضعكم, هو مب عيب فيكم ولا نقص من قدركم لكن هذا تفكير الناس ولازم اخوج يفهم هالشي ويقتنع فيه
ورب العالمين هو اللي عارف وين نصيبه خليه يصبر!

الله يوفقه ويرزقه بـ بنت الحلال الزينة

اخوج بسبت النقص الي فيه يسوي جيه يعني يهين نفسه وعايلته بنفسه بس ماتوصل انه يعرض امج للاهانه ويرجع يقول اخطبولي من نفس العايله

الحل انكم ما اطاوعونه وتقنعين امج انكم ماتروحون ،،

شرات ماقالت تفاحتي اختي مب منه والدرب تروحون يعني ع الاقل لو طرشتو لهم حد تجسون النبض دام حسيتو انه راح تنرفضون ..واختي ع شو تصيح الواالدة ترا قسمة ونصييب الزواج ..وبعض القبايل مايوزون اي حد الا من قبايل اختي ..وتعرفين الغالية باجر يوم الله بيحاسبنا مابيقول وين البلوشي ووين القبيلي كلنا سوا ولا تنقصون من عماركم ولا شي حبيبتي انتو سويتو الواجب وييتو من الباب ..وان شاءالله النصيب بيصيب فديتج ودام اخوج يبا وحدة من اهلها مافيها شي طرشو لهم ريال مايحتاي تسيرون وتنحرج الوالدة ..عنبو مايسوا عليكم فروا الحلاوة فوويهكم عوذ بالله وين الاخلاق ع الاقل احتراام مش لها الدرجة يقولون نشتريكم فنعال يعني للحين هالفئة موجودة ماعرف شو اقول تخلف او شو ..يعني يشترون الناس فبيزاتهم ..وخير ياطير قبيليين ع عمرهم ..
اسمحي لي فولت شوي لانه ماعيبني ردهم اوكيه رفضتو ماله داعي التجربح والاحرااج فللناس فيه شي اسمه اخلاق مب لها الدرجة عااد..والله لو كنت مكانج جان رديت عليهم امي تنهان واسكت

السلام عليكم
اختي للمراقبة العامة ..أنا طرشت مشكلتي من يوم الخميس وللحين ماانعرضت ليش شو السبب؟؟
مع انها عادية ومب خادشة للحياء .اللي هي مشكلة القذف
وانا اجوف تنعرض مشاكل عادية ..
ممكن أعرف السبب؟؟
ومرة بعد حطيت مشكلة ومانعرضت الله يرضى عليج.
لوتراجعين شوي ..واذا فيه شي يليت تردو خبر

عليكم السلام
بخصوص مشكلتك تم الموافقة عليها لم اتواجد الا على السريع لحالتي المرضية ( نعتذر )
بخصوص المشاكل الاخرى بودي ان طرحتي عنوان المشكلة لأنه توجد مشاكل يمنع طرحها
لمخالفتها القوانين فليست كل مشكلة تُطرح
يُغلــــــــــــــــــق

السلام عليكم
ببدا بالموضوع انا احس بالندم واللوم على تصرفي وحتى يمكن اعتبره وقاحه وغير قنوعه وما عاجبني العجب مادري صح اللي سويته او خطا شوفوا الموضوع وخبروني اول شي فيه واحد يحبني واشتغل عشاني دوامين يداوم عشان يولف مهر ويكون نفسه ويخطبني بسرعه واي شي اباه تم يصير والولد جنه خاتم في صبعي ماشاء الله مع انه انا مادري شقول لما كلمته ما كان نيتي تعارف اسااسا هو كلمني يطلب مني اخلص له موضوع بما اني مريت بنفس الشي فساعدته عادي وتم يتعلث يرمسني عشان يشكرني ويخبرني بنتايج اللي سويته من هني بدا الموضوع والحمدلله مافيه اي شي يسود الويه لا اتصالات لا طلعات ولا خرابيط هو يحترمني وانا تحترمه فانا لما افكر اقول مابا واحد يعرفني وبييني واحد احسن منه احسني انانيه مرات كسرت قلب الرياال وايد متعلق فيني واعرف اخته ولما تطري وضعه احس قلبي ينفطر طبعا اخته ماتعرف عن اللي صار بيني وبينه وانا قطعته ع اساس لو يباني ياخذني مب يرمسني من ورا اهلي المهم اني مليت منه احسه وايد ناشب لي وهو اذري يسوي جي يخاف يخسرني وكل يوم كان يقول لي بس ماحس اني مرتاحه في نفس الوقت احس اني تسرعت خاصه اخر مره كان يسالني عن اسمي لان يبا يتقدم لي وانا شسويت قلت بملج باجر عسب بس افتك من السالفه لان اخاف من المستقبل مابا اعيش تجربه خايسه ف شو تنصحوني ارد اعترف اني كذبت واخليه يتقدم او اتم ع وضعي والله يعينه لين ما ينساني هو ؟ للعلم انا من شهر وشي كذبت ومودرتنه بس من ذاك اليوم وانا احس باللوم قلبي يعورني مع انه ما افضى اتم افكر فيه كل وقتي مشغوله اداوم صيفي م وامتحانات وضغط بس رغم هذا افكر فيه ادور اخباره في حساباته
انا ماعرف ليش مب مقتنعه فيه واقول بيي غيره واحلم بشخص معين وشخصيه تكون مادري كيف وو مب عارفه لعمري ولله 💔💔💔

تمت الموافقة
الكلمة الطيبة صـــــدقة

خلاص اتخذت الخطوة الصحيحة ولا تتراجعين .لانج مو مقتنعه فيه ولا بوضعه الاقتصادي وتحاتين المستقبل فليش تعلقين الريال فيج مادام مو في نيتج الارتباط فيه اساسا ؟ واللي قاعدة تحسين فيه الحين ترا من وسوسة الشيطان مو تأنيب الضمير ولا شي لانه مبني على الخطأ .خلاص عيشي حياتج طبيعي وخليه بعد يعيش حياته والله يرزقه بنت الحلال اللي ترضيه ويرضيها .ويرزقه ع قد نيته وانت كذلك .انت اتخذت الخطوة الصحيحة مثل ماقلت لج ف البداية ولا تاخذين وتعطين مع الشباب وابتعدي عن هالامور ووجهي طاقاتج وتفكيرج للدراسه .والله يرزقج ع قد نيتج .هذا ردي على عجالة واتمنى اني قدرت افيدج .
كل التوفيق والسداد

اللي سويتيه غلط
صح انج لازم توقفين ترمسينه
بس يعني الريال نيته زينه
وناوي يتقدم وضغط على نفسه عشانج
ماظن كان بييج اللي احسن عنه
لان اللي يقدر يغير حياته عشانج بيسويلج اي عشان بس ترضين

لا تحطين في بالج بصبر وبييني اللي احسن
حطي في بالج هل هالريال بيداري علي وبيخاف الله فيني وبيصوني ولا لا
اذا كل مايتقدملج واحد بتقولين بييني الاحسن عمرج ماراح تتزوجين
الريال ماينقاس بفلوسه وماله
ينقاس بأخلاقه ومواقفه

سبحان الله اللي اييونكم من الباب تبون الفكة منه واللي يجذب عليكم تحبونه وتتعلقون فيه وعقب يفركم وتييون تكتبون قصصكم هني

بالتوفيق

انا لو مكانج واحد ما فكر يكلمني ويخرط علي بس اعرف انه يشتغل دوامين عشاني بقوله تعال اخطب كخطوة اولى وعشان اتاكد من كلامه اذا هو صادق ولا لاء
مو مهم اهلي يوافقون ولا يردونه
المهم سوه خطوه كبيره ومهمه تدل على انه ريال وشاريني

خبرينا عشان نعطيج مشورة وافيه

الله ييسرلج كل خير

مشكلتي هي بنت خالي ولاني احبها واخاف عليها واعتبرها شرات اختي مشكلتها هي تكلم ولد عمها وها ولد عمها كان خاطبنها بس للاسف صارت مشكله بين الامهات وأدت الى انفصالهم هم الاثنين وعلى حسابهم هم الاثنين البنت للحين تكلمه بس ماطورت السالفه لانه تطلع وياه وانا مابحطي فذمتي لانه هي تقول لا ماطلعت مابقولكم انه الولد ماسوى شي بالعكس هو حاول وحاول وهو يحبها لو مايحبها ع قولتها ما بيرمسها وبيحذفها وانه بيتزوج غيرها وهو الحمدلله ماقاصرنه شي وللعلم هي تكلمه بدون علم اهلها لانه لو عرفوا راح اتصير مشاكل بس هم ما بيدهم شي اباكم تنصحونها يمكن تقتنع ل رمستكم ولحد يقول دخلوا حد كبير يصلح بينهم لانه مشكلتهم عويصه يعني من 8 شهور والولد يحاول ف الامهات و8 شهور وهي تكلمه وماشي فايده وياما ادخلوا الكبار وماشي فايده انا ابا رأي وحده حكيمه يمكن تقرأ وتقتنع وللمعلوميه البنت بعدها صغيره 19 سنه يعني عقلها صغير والولد عمره24 يعني كتاكيت والسموحه طولت عليكم

تمت الموافقة
الكلمة الطيبة صـــدقة

ليش طلقها هى بنت عمه وهو يبغاها وهى تبغاه ليش دخلو الخلافات الاسريه بين الامهات
كان وقف في وجهم وقال لن اطلقها واين الاب والعم من هاذي النزاعات وين الحكيم في العائله كان قال لهم انتم مختلفين ما يدخل في اختلافكم الابناء

الحين صعب الامر لانه الامهات في خلاف مستمر والاباء مالهم شخصيه في العائله
العيال مالهم ذنب ليش يدخلوهم في صراعاتهم
وعن تتواصل مع ولد عمها القرار بيدكم يكون تحطو حد للموضوع وترجعوهم لبعض

المفروض انتي يكون لج وسيلة تجمعهم فبعض دام لهالدرجه يباها وتباه اسعي تجمعينهم والاهل لو زعلو مردهم لبعض

انتي ما يخصج هو شو ما تسوي

المفروض هي ترد علي برد ان انتي مالج خص , لان انتي مب طرف بالموضوع

انتي قلتيها

بالتوفيق

الافضل انج ما تتدخلين بينهم وعليج بالنصيحه بس عسب لو صار ما صار (لا قدر الله ) بدخلونج فالموضوع