تتوقعون الحالة اللي فيني طبيعية ؟؟

هلا خواتي ..

أنا عندي مشكلة يمكن الكل يشوفها عادية .. بس وايد متعبتني ..

خواتي ..

أنا من صغري حساسه .. وبسرعه ازعل .. على قولتهم دلوعة .. بس احينا صايرة وايد احاتي واتحسس من اشيا تافهه ..

اليوم ريلي سافر الله يحفظه .. أمس فليل ما قدرت ارقد .. ويلست اصيح .. معنه هاي مب اول مرة يسافر عني .. كل فترة يسافر .. بس هالمرة وايد اضايجت .. واليوم يتني حالة كآبة لدرجة اني يالسه ومب رايمة اسوي شي ..

امسات سمعت صوت ولدي يصيح وهو كان عند ابوه مع ربعه في الميلس .. اتخيلو تميت اصيح ليه ما عمتي اتصلت فيه وقالت له ييبه لامه .. وتميت لاويه عليه ليه ما سكت .. وعقبها حسيت عمري سخيفة .. والكل كان مستغرب من اللي سويته .. لأنه هاي مب عادتي ..

واذا اتصلت في حد وما رد علي .. اتم احاتي .. واحس قلبي يتم يدق بسرعة ..

واذا سمعت حد متوفي .. اتم افكر وتصيدني حالة كآبة .. حتى لو ما اعرفهم ..
أمسات ريلي يقولي عن شاب متوفي في حادث سيارة .. تميت اصيح ..

احسه كرهه عمره .. يقولي احينا ما اروم اقولج اي شي .. صايرة بسرعه تصيحين وتحطين فخاطرج ..
اتخيلو مرات احرق تيلفونه .. ويوم يرد علي اقوله انته بخير .. وابند .. ما عرف شو اقول عن عمري ..
اليوم يايه عند اهلي .. وكلهم حاسين اني متغيره .. يقولولي انتي مب طبيعية ..

تتوقعون الحالة اللي فيني طبيعية ؟؟

ولا وايد ناس جيه ؟؟

أنا امي الله يخليها .. وايد تحاتي بس مب شراتي ..

يعني انتي فيج وسواس في كل شي..وهالشي مب زين لا لج ولا لغيرج..

اولا مب زينه لصحتج ..واهم شي في هالحياه هي الصحه ..والصحه فوق كل شي..

وحتى الناس اللي حواليج بيضايجون منج ..لان كله تحاتين وخايفه ..وحتى يمكن انتي تحاتين لاتفه الاسباب