يترياها من 21 سنه ! عطوني حل !

السلام عليكم ورحمة الله وبركاته

خواتي أبا حل حق مشكلة خالي ..

بسم الله ..

أول شي خالي الله يعطيه طولة العمر عمره 43 سنه ..
قبل 21 سنه انعجب فـ وحده من فريجهم وهي انعجبت فيه .. عقبها بـكمن سنه قرر يخطبها بس المشكله ابوها رافض زواجهم نهائياً والسبب *نحنا عيم وهم عرب*

هو ما يبا غيرها وهي ما تبا غيره .. والعمر يمشي وهي واايد يو يخطبونها وكانت ترفضهم لأنها تبا خالي ونحنا وايد حاولنا ويا خالي ان نخطبله وحده ثانيه بس هو ما يبا غيرها .. باجر ما بتروم تيب عيال ..
اخوانها وخواتها راضين ع خالي بس المشكله العوده ابوها ! راسه يابس ! ما يفكر فـ مصلحة بنته .. يقول : "شو بيقولون عنا الناس اذا ناسبنا عيم !!"
يا سلام ! ليش العيم يايين من كوكب ثاني !!!
محد يخطبها الحينه لان كل الناس يدرون انها تبا خالي ..
وهي تخاف تسوي اي شي غصبا عن ابوها لأنه فيه القلب مادري الضغط ..

خالي لو كان مب زين أو راعي بنات أو يشرب كنت بقول من حق ابوها انه يرفضه بسسسسسسس القهررررر انه ودّر كل الصفات الزينه اللي فـ خالي وركّز عالأصل والفصل ! عيل تاخذون هنود ! ما تقولون هاي هنديه ! يت عالعيمي !!!! عنده بيت الحمدلله ويشتغل وإنسان طيب وخدوم ويصلي ويصوم وأخلاقه زينه ! ها كله مب تارس عينه !

هو الحينه من 21 سنه يتريا موافقة ابوها !! ضيّع 21 سنه من عمره بسبّة هالتخلف اللي فـ مجتمعنا ! ترا كلنا من آدم ! وكلنا نهايتنا قبر !

قولولي شو الحل ويا ابوها !!
لا تقولولي خله ينساها أو هي تنساه >> ماشي فايده !

اختكم ..

جنوني*

حليله والله كسر خآطري ،،
وهي بعد كسرت خآطري ..
مع آنه عآدي مآاحس فيهآ شي ..

تآخذ عيمي شو فيهآ ؟!
خير يآطير ..
وين المشكلة في الموضوع يعني ..!
ترآهم عآيشين ويآنآ بعد شوو !!

والله مآدري شو آقولج يآخيتي ..
القلب ومآيهوى ..
يبآله حد يكلمه ويفهمه ..
حد يقنعه ..

والله كريم ..

الكبار الله يعطيهم الصحة والعافية وطولة العمر تفكيرهم غير عن تفكير الجيل هذا

عندهم الاصل والفصل والحسب والنسب اهم من اي شي ثاني

في ناس تفكر في نسلها ونسل عيالها

في ناس حتى لو عرب وواحد منهم سار وخذ وافدة عيال الوافدة ما بياخذونهم عيال العرب ظهر وبطن لازم ياخذون لهم حد بعد امه وافدة

خالج ضيع شبابه في انتظار حلم يمكن يتحقق ويمكن لا

الله ايسر لهم الخيروين ما يكون

كسرو خاااطري

الله ايجمعهم ويا بعض يا رب وان ما اتحقق في الدنيا ان شاء الله في الاخره

والله ايهدي ابوها

دام هو صاحب دين وخلق ليش ما ايووزونه
لو فرَااش والله وهو على اخلاق ودين بنيوزه
ويعني ابوها ليش مايفكر يعرف بنته في بالها واحد
ولا هو اعنااد وغيااض بس >> انا هاي الرمسه مادانيها لحد يغايضني
ليش هالتخلف بعد فالمجتمع
خلاص الناس اطوروا من كل النوااحي
خل اخوانها يضغطوون على ابوها ويوم بيجوف كلهم ويا بنته بيواافق
وخلهم يصبروون والله يوفجهم وكل وااحد الله ينوله اللي في باله
ههههههههههههههه خلي يخطف البنت بس قوليلها اتجهز شنطتها>> والله صج
يعني حراام من 21 سنه يتريااها وين الناس الي يقدرون الحب وينهم
يمكن ابوها شي فيه يعني يعني شي في راااسه ( مريض ولا شي)
اذا جيه عادي اخوانها يصيرون اولياء امورها >> اظني والله
والله ماقدر اعبر من الغصه حراام 21 سنه

نحن من العرب الاصليين في بوظبي بعد بس عادي فديتج وايد من هليه خذوا عيم و مب حاطين في بالهم فيه فرق اصلا

بس الي مب داش مخي خالج يحبها بمجرد انها شافها بس ؟ ولا كلمها ولا شو ؟؟ شو الي يدفعه يتعلق فيها كل هالسنين ؟؟ اخلاقها؟ جمالها؟ شو بالضبط؟؟

ما شااء الله تبارك الرحمن صج خالج ووووووووووفي هذاا الحب الحقيقي
الله يهدي ابوو البنت وان شااء الله مرده يووافق والله يووفقهم ان شااء الله ويجمعهم ع خيييييييييير

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.