اول شي الحمدلله اني ربيت بالسلامة
ويبت ولد الله يحفظه
بس اللي كنت خايفة منه استوى
كنت طول فترة الحمل ادعي ان ولادتي تكون طبيعية و اسوي اي شي يجنبني العملية والحمدلله حملي كان صحي و كل شي زين ولين آخر لحظة كانو يقولولي ان ولادتتي ان شاء الله بتكون طبيعية
بس للأسف ..
نبض البيبي كان يقل وقالولي لازم عملية
جتلت روحي من الصياح
الحمدلله على كل حال
اكيد مستغربين انا ليش مكبرة الموضوع هالكثر
وان وايد يولدون بالقيصرية وانه شي عادي
بس انا كنت ابا اييب الثاني على طول او عقبه ب6 شهور او بالكثير سنة
والحين عشان العملية لازم امنع سنتين عشان احمل في الثاني
والسبب الثاني اللي مخوفني من العملية
اني اييب الثاني بعد بعملية
واذا صار هالشي لاسمح الله مابقدر اييب طبيعي ابدا
ادري بعد بتقولون ان هالشي عادي
بس هو مب عادي ابدا بالنسبالي
و السبب .. قصة طويلة ما احب اذكرها
سؤالي :
اللي تعرف وحدة سوت قيصرية وعقب يابت طبيعي او مرت بهالتجربة بليييييز تقوللي وتطمن قلبي
واهم شي تذكر المدة بينهم
يعني متى حملت بعد العملية و يابت طبيعي
بس ابا اتطمن لأن صدق نفسيتي تعبانة
و شكرا 
اختي
دام ربج كتب انج اتربين قيصري
معناته هالشي هو اللي كان فيه الخير لج .. لو انج كارهه هالشي
والحمدلله ع كل حال.. صح الواحد ما يتمنى الا الطبيعي
بس ما نقدر ننكر انها رحمة من الله .. حريم اول اللي اتموت واللي ضناها يروح من ايديها
هالاشيا مب هينه
لو مب ارادة الله ثم هالعملية .. جان احتمال يروح ولدج اللي اترييتييه طول هالاشهر بعيد الشر عنه وحفظه ربي لج واسعدج فيه
ثاني شي
كيف تبين تحملين عقب ٦ اشهر من بعد الولاده
ولدج كيف بياخذ حقه فالتربية والرضاع وغيره
وجسمج متى بيمديه يرد اللي راح منه ابفترة الحمل
وتربية يهال اثنين ما امبينهم فرق شي مب هين ابد
هذا كله يتطلب مسؤوليه تلتزمين بها
والانسان له طاقه .. نحن مب شرات حريم اول
واحد ورى الثاني والحياة حلوة
تربية جيل الحين ابد مب سهله
بخصوص العملية لا اتحاتين
ياكثر اللي بجرن ابعملية
والحمدلله الله يسر لهن فالحمل اللي عقبه بولاده طبيعيه
بنت عمي ما شاء الله بجريتها عمليه
حملت من بعد العملية ب٦ شهور اتوقع
وربت طبيعي .. وكل ولاداتها اصلا طبيعي الحين ولله الحمد
ووايدات اعرفهن جذه
هو لو فيه مشكلة فالحوض او عنق الرحم
ذيج الساعه الولادات اتكون كلها قيصري
انتي ولدوج قيصري بسبة نبض الجنين
مش لانه الحوض عندج صغير او عنق الرحم صغير ما يتوسع
في فرق
الله يجدم لج اللي فيه الخير
ومبرووك ما ياج ان شاء الله
^^
الغاليه اختي يابت قيصري وعقب قالت لي شسوي
قلت لها احبي في الغرفه وامشي من نص الثامن
وكثري سجود ولاتسيرين لين تحسين الطلق ياج
ويوم سارت لهم حصلت 4 سانتي ولدت طبيعي
اللحين عندها 5 بنات ولد واحد
ترى كل جنين غير عن الثاني
بس ترى اليلسه في الاشهور الاخيره هب زينه وايد لوضعيه الجنين
والبس الضيق وقت الحمل هب زين لجنين
فيا اختي مايضر لو حملتي عقب سنه
لان اخت ريلي قيصري وحملت عقب سنه من ولادتها
وبخصوص انج تحملين ورى بعض انا اشوف ان هالشي عادي
بالعكس راح ترتاحين اكثر تيبين 3 او 4 وتوقفين عشان تربينهم وتتفرغين لعمرج
والله يوفقج وحمدالله على سلامتج
والله يا اختي الحين العمليات القيصرية انتشرت بشكل كبير وصار شي عادي .. طبعا انا اتكلم عن الي تسوي العملية مجبورة ولسبب .. مب اختيار
وانا مسوية 3 عمليات .. والحين هالحمل بعد عملية والله المستعان ..
للرفع
ثانكس حبيباتي
ردودكم ريحتني
صح … يمكن هالشي يكون خير لي
والحمدلله على كل حال
حبيبتي انا من3شهور ربيت وجبت ليلي وقبلهابسنه جبت يوسف وبعد يوسف ب3شهور حملت بلولا والاتنتين قيصريوعادي جدا وفتحولي بطني مرتين خلال سنه لو تحبي نكون اصحاب ياريت نتراسل عالخاص