السلام عليكم
أول شي حبيت اشكر كل بنت باركتلي عالملجه والله استانست وايد بردودكم
وهالشي خلاني اثق فيكم واكتب مشكلتي..واللي ضميري يعورني وايد
ما بطول وبدش فالموضوع عالطول
الحمد الله ورب العالمين ملجت ويوم الثاني تيمعت مع ربيعاتي عسب اتخبرهن عن الملجه وشو رايهن فيها..والخ
طبعا مع الشله كانت بنت عمي..هي قدي … كانت عليها ملامح حزينه او متضايجه وكله ساكته استغربت منها
ماحبيت اسألها جدام البنات لاني ما بتقول شو بلاها…المهم تيمنا نسولف لين هلكنا <<<واستانست ان الكل عيبتهم الملجه …بس غرت لانهن واايد يرمسن عن ريلي خخخخ
وعقب روحن وخليت بنت عمي اتم وياي عسب اتخبرها شو بلاها..!!
بعد ماحاولت منا ومناك عسب تقولي شو بلاها … واشويه اشوف عيونها تدمع ..وانا مصدومه قلت شي فيها ..وماطاعت ترمس ابدا..وبعد ما هديتها عقب قالت لي سالفه
السالفه يا خواتي هي …
يوم كنا صغار تقريبا فالاعداديه …كنت العب مع عيال عمومتي وخالي
وطبعا بنات عمومتي وياي …المهم ان عمي الاكبر عنده ولدين اكبر عني …واحد كبري والثاني اكبر عني بسنتين
كان دوم اللي اكبر عني بسنتين يدافع عني ويعطيني حلاوه كل يوم ..يعني كل شي اييبه لي …وانا طبعا كنت اشل عنه الحلاوه وافلعه بالحصى خخخخخ<<<كانت ايام حلوه ههه
واللي كبري دوم يضاربني ..وايير شعري .. وطبعا العود دوم يدافع عني
ومرت الايام وكبرنا وصرت 2 ثانوي …في هذي الفتره كنت ما اسير عند عمومتي لاني كبيره استويت اونه عيب … ومره كنا مسوين عزيمه لنجاح اخوي العود ..المهم الكل اتيمع في بيتنا..وشفت عيال عمومتي اللي كبري واللي اكبر عني بسنتين شالين صينيه العيش ..يالسين يبحلقون وعقب سلمت عليهم <<محد يدري ..لا تخبرو امي انزين ههه
وعقب شفت اللي كبري برع يالس قالي بقولج شي في خاطري من زمان اقولج اياه ..قلت شو تبا بسرعه مب متفيجه لك انا<<كنت ما اعطي ويه حق الاولاد لاني ما اداني اخواني" حتى كرهت شي اسمه ولد هه" بسبب مايخلوني اطالع ليدي هههه
المهم قالي انا اباج ويوم بشتغل بخطبج انزين ..رديت عليه قلت له وععععععععععع ما اخذ هالشيفه <<ترا كان لساني وايد طويل والحين قصير استوى هههه
وبعد اسبوعين شفت اللي اكبر عني بسنتين ..ويالس يسويلي حركات ومادري شو وعقب قالي نفس كلام اخوه ..جان اقوله اخييييييييه عليك ما اخذ هالشيفه بعد ..لا انت ولا اخوك باخذكم..مابا اعرس ابا اكون عانس كيفي انا <<<لالا تتحرون اني متكبره لالاكنت ما اداني شي اسم ولد عسب جي اقول جي
عقب هالسالفه ماعرفت عنهم شي ابدا
والحين بنت عمتي بتخبرني ليش تصيح كانت
قالت لي اللي اكبر عني بسنتين تخرج واشتغل قال حق اهله انا ابا اخطب بنت عمي " الهيزه" يعني انا<<تبا تخبركم يعني خخخ
وعرف اللي كبري بالسالفه واستوى بينهم تاتش وضرابه ومادري شو
يه ابوي وعمي ويمعوهم وقال ابوي لا انت ولا ثاني بياخذ الهيزه"يعني انا" ..مابزوجها من الاقارب ابدا <<<<طبعا انا مادري بهذي السالفه ابدا ابدا ..وع فكره ابوي متعلم ومثقف …وهو يخاف من شي اسمه وراثه ..عسب جي مايبا حد ياخذ من الاقارب
انزين الحين انا كتبت قصه حياتي خخخ
تبون تعرفون وين المشكله صح…!!!
المشكلة اني انا السبب الي خلا الاخوان يتفارقون …وكل واحد مايحب الثاني …
وبعد ماقلت لكم ان اللي اكبر عني بسنتين يوم سمع بخطوبتي سار عن اخته وتم يقولها قوليلها لا توافق وقالها السالفه ليش هو مايحب اخوه الصغير <<<ترا بنت عمتي بعد ماكانت تدري بالسالفه الضرابه ابدا ابدا…
واللي كبري ..الصراحه انا سمعت انه استوى مغازلجي
والله ضميري يعورني
يعني الفرحه بعد ما اكتملت 
صدج وايد افكر فالسالفه …وتميت اسب عمري وايد
ما اتخيل اني فرقت بين الاخوان ما اصدق والله
شو تنصحوني اسوي ؟؟
لا عادي هاي سنت الحياه
وليش قلبج يعورج إنتي لاوعدتي ها ولا هذاك
وختي إلي الله كاتبنه لج ومن نصيبج
اول شي الف مبروك والله يتمم لج على خير
ثاني شي محد ياخذ في الدنيا غير نصيبه صح عيال عمج كسروا خاطري بس هذة سنة الحياة باجر بينسون وبيلاقون بنت الحلال باذن الله
ماعليه الله يرزق الانسان و يكتب اللي فيه الخير
و ادعيلهم ربي يجمع مبينهم مره ثانيه ^_^ و ماعليج لا تشغلين بالج
الله يهديهم
ماعندهم سالفه
رابط الاخوة بينهم ضعيف
عشان بنية يتفرقون اخوان……؟؟؟؟؟
انتي مايخصج المشكله فيهــــم
استغفر اخوااااااااان يتضاربووون عشان حرمه
الله يرزقهم ان شاء الله
انتي ليش تحسين بتانيب الضميييييييير !! هالشي مالج ذنب فييييييييييه
اصلا بنت عمج هذي ماتحبج…. لو تحبج جان ماخبرتج بالسالفه…
خلاص انتي رحتي لنصيبج… مافي داعي تفكري او تحيرين عمرج..
مشكلتهم بيحلونها.. وبيكبرون وبينسونها.. لا وبيضحكون على عمارهم كيف كانوا سخيفين وعقلهم صغير حق اتفرقهم وحده مهمن كانت…
الله يهديكم يميع