منو قال اني سكتت! الجزء الثاني

طبعا انا وايد استانست وكنت ابا اقول كلولولولولوش بس طبعا احترمت عمري وكنت هادية

قلت: الحمدلله بادرة طيبة.. الله يقويكم.. صراحة ما قصرتوا وانا ماخليت حد ما خبرته السالفة..
قال: عشان جي كل اللي يتصلن هالايام حريم يشتكن
قلت: هاه!!!!!!! طبعا انا قفط ويهي.. ما اتوقعت ان في بنات بدت يتصلن ويشتكن بس بعد فرحت في نفس الوقت
قال: نحن نرحب بكل اللي يتصلون يشتكون.. بس نطلب اوراق تثبت الكلام.. وعقب نقوم ونروح المحل او المطعم او المكان اللي مشتكين عليه ونشوف المنيو ونشوف الفواتير..ألخ وناخذ صور وعقب نتخذ الاجراءات اللازمة…والحين اقولج.. بنصكر موضوعج لان بتحول لجهة اكبر..جهة اتحادية.. والحين بنبدا نمر على كل المطاعم في ابوظبي وبناخذ صور من الفواتير والمينو وبشوف كل مطعم كم حاط سيرفس شارج وبنحطه في تقرير وبنوصله للوزير مع رسالة ان السيرفس شارج ينلغى من كل المطاعم في الدولة..ونحتاج وقت لان وايد مطاعم في الامارة

شفتوا كيف يا بنات…
لو انا سكتت وانتي سكتي وغيرنا سكت جان ما صار ها كله.. جان تموا الزلمات وغيرهم يستغلونا..
الحمدلله اني رمست وخذت الفاتورة.. واتصلت واتكلمت

ربيعاتي كانوا يقولون لي وقتها انتي راعية مشاكل.. والحين قالوا لي والله زين سويتي فيهم
وقبل ولا وحدة كانت تشيك الفاتورة.. انا الوحيدة اللي كنت امسك الفاتورة واشيك.. من عقب ما قمت اطلع اخطاء.. نشرت العدوى بين ربيعاتي والحين قامن يشيكن الفاتورة قبل الدفع
المفروض احصل جائزة نوبل للسلام.. ولا يخلوني محامية دفاع عن المواطن..ياويلي شو سويت.. لوول