مشكلة ربيعتي مع ريلها اللي يحب وحدة محترمة في الدوام

ربيعتي متزوجة من ثمان سنوات .. حبوبة و متعلمة و مب مقصرة مع ريلها و عندها ثلاث عيال الله يحفظهم .. و ريلها ولد ناس و محترم و اجتماعي و وسيم .. عايشين في سعادة لين كم شهر ..

من ثلاث شهور وحدة دوامت مع ريلها في الدوام .. و ريلها اتعلق فيها .. و خبر حرمته إن يبا يتزوج عليها .. بكل صراحة .. خبرها إنه يحبها و معجب فيها و يبا يتقدم لها رسمياً بس ما يبا من وراها و قالها أنا ما بقصر معاج في شي .. بس أنا حبيتها و أبغي أتزوج و الشرع حلل أربع .. ربيعتي اتخبلت و خذت عيالها و سارت بيت أهلها .. و هو حاول يرجعها البيت هي ما وافقت لين ما يهون فكرة الزواج و هو رافض .. يقول البنت فيها صفات كل ريال يتمنى مثلها ..

المهم ربيعتي من القهر اللي فيها قالت لازم أشوف البنت و أؤدبها .. و قالت أكيد هاي وحدة ماصخة و بايخة و لاعبة بعقل ريلها .. المهم ريلها سافر دورة أسبوع فاستغلت الفرصة و سارت الدوام بدون ما اتخبر ريلها ..و شافت البنت من بعيد .. و اتخبلت أكثر لما شافتها ..

البنت حلوة واااااااااايد .. مؤدبة .. خلوقة .. لا مكياج و لا حركات .. سيدة في حالها .. من النوع المحترم .. ما تضحك مع الرياييل .. من النوع النشيط في عملها .. و سألت عن طريق وحدة و عرفت أن البنت بنت ناس .. و معروفة في الدوام إنها ما اتكلم الرياييل إلا في حدود الشغل لا أكثر ..

ردت البيت و هي منقهرة ما اتعرف شو اتسوي .. البنت جمال و أدب و حشمة و في حالها .. عشان جذه ريلها متخبل عليها ..

رد ريلها من السفر بعد أسبوع و خبر ربيعتي إن يبا يتقدم حق البنت رسمياً و حلف أنه لين اليوم ما كلم البنت في الموضوع إلا في العمل فقط ..

شو اتسوي .. ربيعتي محتارة تتطلق و لا ترضى بالامر الواقع ..