مدة الحمل كيف نحسبها؟

انا حللت مرتين

وطلعلي النتيجة حامل الحمدلله و قريب بسير المستشفى براجع

ألف ألف مبروك و ربي يثبت حملج و يسهل عليج يااااااا رب و يرزقج الذريه الصالحه ان شاء الله

الحين عندي عدة اسئلة بما أنه هذا أول حمل وماعرف شو السالفة خخخخخ

حاضرين للطيبين

الحامل تييها الدورة ولا؟ سوري بس ماعرف >_<

لا ما اتييها الدوره طول فترة الحمل ..

متى أحسب مدة الحمل ؟ انا قالولي من آخر دورة .. انزين انا المفروض الدورة تاريخ 23- 3 بس انقطعت هل من هالتاريخ أحسبها ولا الدورة اللي قبلها؟

تحسبين مدة الحمل من تاريخ آخر دوره يتج .. يعني اول يوم في آخر مره يتج فيها الدوره .. مثلا يتج آخر مره تاريخ 20-2 فتحسبين من هالتاريخ

المعاشرة الزوجية في وقت الحمل هل يعتبر خطير ؟ و هل المفروض الامتناع؟ خاصة في الشهور الأولى؟

اللي ينصحون به التقليل و خصوصا في اول 3 شهور لين يثبت الحمل ان شاء الله و بعدين عادي بس يكون بشويش ..

بسير براجع في مستشفى دبي .. هل حد جرب المراجعة هناك؟

انا اراجع هناك .. و بصراحه على حسب الدكتوره اللي بتدخلين عليها .. في منهم زينات و منهم نحسات .. لأن في كل مراجعه الدكتوره تتغير مب نفسها ..بس بالنسبه للمراجعه اللي اعرفه ان المفروض تراجعين في عياده مثل عيادة بوهيل او قصيص المهم هالعيادات و عقب هم بيحولونج مستشفى دبي .. يوم بدشين الخامس ..

شو نصيحتكم لي بشكل عام؟

طبعا عارفه كلام الأفلام خخخخخخخ لا تشلين شي ثجيل و ريحي قد ما تقدرين خصوصا في هالشهور الاولى .. و عليج بالتغذية السليمه .. و لا تنسين حبوب ( فولك اسيد ) كل يوم حبه و لا تنسين تاخذينهم كل يووووووووووووووم .. لأنه وايد مفيد .. و طبعا الفيتامينات و الحديد اللي بيعطونج اياها في المستشفى بس هذا بعدين المهم الحين الفولك اسيد ..

ومشكورات مقدماً ^_^

العفووووو

و للمعلومه و الافاده :

حسابات الحمل – :

الشهرالثاني:
4 أسابيع و4 ايام تدخلين بالشهر الثاني.

الشهرالثالث:
9 أسابيع تماما تدخلين بالشهر الثالث.

الشهرالرابع:
13 أسبوع و3أيام تدخلين بالشهر الرابع.

الشهرالخامس:
17 أسبوع و6 أيام تدخلين بالشهر الخامس.

الشهرالسادس:
22 أسبوع و2 يوم تدخلين بالشهر السادس.

الشهرالسابع:
26 أسبوع و5 أيام تدخلين بالشهر السابع.

الشهرالثامن:
31 أسبوع و1يوم تدخلين بالشهر الثامن.