محتارين شو نختار لبيتنا اليديد ؟؟؟

السلام عليكم

اشحالكن أخواتي ؟

الحمدلله بدينا ف بناء بيتنا اليديد بس محتارين شو نختار من أرضيات ل :

مجلس و الصالة و لغرف البنات و غرف الشباب وأطقم المطبخ و الحمامات – الله يكرمكم

الوالد ربي يحفظه عجبه رخام و سراميك راس خيمة
بس اخوي قال يبالنا نروح نشوف الصيني
وأخوي الثاني يقول شي محلات صوب وكالة بي ام اظني فشارجة بوديكم

ماشيء وقت مفروض نختار خلال هالاسبوع بس اتوهقنا يوم رحنا السوق
كل واحد يختار نوعية و لون حسيت اني ضعت ما عرف شو دارج و شو اليديد و كيف الأسعار بالمتر؟

فحبيت أشاوركن وآخذ رايكن وأدري انكم ما بتقصرون

وين أقدر أحصل محلات ل أطقم المطابخ و حمامات الله يكرمكم ؟
شو احسن نوعية من رخام أ و سراميك أو جرانيت و شو الفرق بينهم ؟
و شو الألوان اللي تنصحونا للأرضية مجلس و الصالة ؟

اتمنى اتدلوني ع محلات في دبي -شارجة او عيمان فقط تكون شاملة الاغراض وترضي جميع الأذواق واذا عنكم صور اتوضحون لي اكون شااااكرة لكم

رح يسعدني اقتراحات وأفكاركم
أتريا الردود بفارغ الصبر
ربي يحفظكم

مبروكين البيت اليديد و ربي يرزقكم خيره و يكفيكم شره

اللي فهمته ان طلباتج معظمها سيراميك سواء ارضيات او جدران، حمامات-كرمتي- او مطابخ
و الشي الثاني:تبونهم بسرعة و ما في وقت..يعني لازم معظمها تلاقينها في نفس الاقليم على الأقل
و تبون أشيا يديدة و حلوة

امممممم

لي خبرة ضئيلة في هالمجال و حابة أرد عليج..و أساعدج

أختي..في محل اسمه نازو بالشارجة..في فرع عند مركز الذهب..و الفرع الثاني صوب الصناعية على ما أعتقد..خذي رقمهم من البدالة قبل لا تسيرون و اسألي عن المكان و نوعية السيراميك و تفاصيل ثانية إذا تحتاجين..يعني عسب ما تضيعون وقت و درب عالفاضي.
شوفي..هم عندهم سيراميك وااايد حلو و حتى أفكار التركيب رووعة..معظم اللي عندهم اسباني غالي شوي..بالنسبة لي آخذ عنهم القطع المميزة من النوع الاسباني و باقي الحمام عادي أركبه صيني..فيطلع الحمام حلو و راقي و بسعر مناسب..

على فكرة ..حتى حول هالمحل"نازو" في محلات ثانية ترومين تاخذين عنهم سيراميك او رخام او ادوات صحية للحمامات..
الله ييسر عليكم و يوفقكم..

فوداعة الرحمن

هلا الغاليه طبعا ارقى شي الرخام بس مشكلته عقب فتره يشرب ماي ولونه شوي يتغير هاللي عرفه بس اللي يمدحوونه ووايد الجرانيت يقولون يتحمل جون ولونه ميتغير وشكله وااااااااايد رااقي يشبه لرخام انصحج بالجرانيت ارقى وافخم من السيراميك

هممم الغاليه سيراميك راك ما عليه كلام و خصوصا الجرانيت للارضيات

الصيني كل حد يركبه بس ماعرف جودته الصراحه بس اشكالهم روووعه

الله يسهل عليكم

سراميك رأس الخيمه ما على كلام نحن مستخدمينه فى بتنا

لارضيات البيت جرانيت صيني انا مركبتنه فبيتي وطالع غااوي ماخذته من الصناعيه في الشارجه محل عوود شوي صيني والمتر مربع ب24 درهم .. اما الحمامات سيراميك اسباني في تشكيلات روعه واسعار مميزه نفس الشي من الصناعيه بالشارجه .. والمطبخ بعد سيراميك اسباني .. كل شي بتحصلينه بالصناعيه بالشارجه وكل فمكان وااحد والمحلات عند بعض يعني ما تتعبين

بالتوووفيق

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.