السلام عليكم ورحمة الله وبركاته
مرحبا خواتي
مثل ما ذكرت مسبقا
ان ربيعتيه ما شاء الله انخطبت ومهرها ما اذكر بالضبط بس بين ال 70-80 ألف
فمش عارفه شقايل اتقسمه
للذهب والقمصان النوم والملابس الداخليه وملابس الطلعه والنعول والهاند باغ والمكياج والعطور والدخون والساعات والاكسسوارات والشبرات والعبايات والشيل وشيل البيت والكريمات وكل شي
وطبعا لفستان الملجه وتعديل الملجه من ميكاج وتسريحه وحنا وصبغة شعر وتنظيف بشره وحف وغيره
ونفس الشي للعرس فستان العرس والحنا والتعديل والسمكره قبل العرس
يعني ياليت وحده اتقسم لنا عدل كيف توزعها صح بطريقه حلوه واقتصاديه مع ذكر التفاصيل والعدد لكل شي
مثلا قمصان نوم تاخذ لها 29 قطعه <<<على سبيل المثال يعني
وبعد ياليت اتفيدونها
وين تشتري الذهب؟؟
وشو تشتري اطقم والا اساور ولا خواتم ؟؟
ومن وين تشتري القمصان النوم؟؟
ومن وين التنانير والقمصان؟؟
ومن وين الجلابيات مال الطلعه؟؟
ومن وين تشتري كل شي؟؟
ياليت ذكر اسامي المحلات اذا مش ع العام ع الخاص مع ذكر الاسعار؟؟
واكون شاكره الكم انا وربيعتيه ونقولكم يزاكم الله الف الف الف خير
ونردها الكن ف افراحكن ان شاء الله
نفس مشكلتي … واللي بتفيدج بتفيدني ^_^
حبيت ارفع لج الموضوع
نفس الحاله وياي ؟؟؟؟
نفس الحاله بالظبط
الوالد امس قاعد ع راسي يالله قومي انقسم شو بتاخذين واذا يكفي ولا لا
للرفع
نفس الحاله مهري 70 الف ومب عارفه شسوي
بديت اتشرى على الخفيف من راتبي لاني احس المهر ماراح يكفي
ياليت اللى عندها خبره تفيدنا جزاها الله خير
اذكر انهم عطوني 80 ألف .. خليت 40 منها للذهب .. خذت فيهم اربع أطقم وثلاث اساور وخواتم ما اذكر كم يمكن 5 وطقمين خفاف يعني سلسلة وفيها تعليقة .. طقم الخطبة وطقم الملجة اهل المعرس يابولي اياهم واخويه خذلي طقم هدية فطلع واايد واثنينه منهم للحين مب ملبوسين 
لاني ما احب الذهب وايد وما البسه دووم ..
بالنسبة لباجي الاغراض فصلت تقريبا 10 عبايات ثلاث منهم متروسات شغل للمناسبات والباجي شغل خفيف أوساده ونوعت بين المسكر والمفتوح ..
كثرت من الجلابيات والمخاوير لاني ساكنة عند اهل ريلي بس ما اعرف كم العدد بالظبط ..
قطع المخاوير خذتهم من مركز سارة ومن سوق السور فالشارجة .. والجلابيات من كل بستان زهره
قمصان النوم ما خذت وايد .. يمكن 15 .. والبيجامات يمكن 15 أو 20 .. طبعا تنوعين بين الطويل والقصير والمسكر والمفتوح والشفاف وهالحركات .. وحاولي تاخذين من كل الألوان .. والمحلات عندج نعومي ولاسنزا وومن سيكرت وفيمنا وبرينسس سيكرت وسكند سكن وغيرهم .. بعد محل الكشخة مال الجلابيات اللي في بوهيل عنده قمصان نوم حلوة واسعاره حلوة ..
الجنط والنعول المحلات تارسة المراكز بس نصيحه لا تكثرين .. انا ماخذه تقريبا 9 او 10 نعول للطلعه وحوالي 5 للبيت وطبعا في منهم للحين يداد ما انلبسن.. لاني حملت وما اقدر البس كعب .. والجنط نفس الشي .. خذي كذا لون محايد ولا تتوهقين مثلي ..
الميك اب لا تكثرين منه ولا تحطين له ميزانية عوده .. احس العرايس وااايد يبالغون في هالشي لكن الحمدلله خالتي نبهتني لهالشي قبل لا اشتري وخذت اللي احتاجه بس .. لأنه له فترة صلاحية في منه 3 اشهر وفيه 6 وفيه سنة .. فطبيعي بتردين تشترين .. وحرام تشترين يديد واللي قبله مستخدم مرة او مرتين ..
الكريمات والعطور وهالسوالف كلها وصلتني هدايا ما اشتريت شي .. وللحين عندي مندوس شكبره متروس عطور وكريماتهم يداد بقراطيسهم مع اني معرسة من 6 اشهر تقريبا ..
الساعات اشتريت وحده بس ووصلتني اكثر من 12 ساعه هدية بعضهم للاستخدام اليومي وبعضهم ماركات غالية شوي تقريبا ب 10 آلاف أو 15 ألف الساعه ..
حطي في بالج هالنقطه معظم الناس تهدي عطر + كريمات + ساعات .. فلا تكثرين من هالاشياء لانه بيوصلج وااايد وبتحتارين وين تودينهم ..
امممم هذا اللي اتذكره الحين .. صابني ضعف ذاكرة من الحمل .. بس اذا بغيتي اتعرفين شي أو تسألين عن شي نحن فالخدمة ..
نسيت اقول ترا الملجة من فستان وحنا وميك اب وكل شي تكفل فيه الوالد الله يحفظه .. ونفس الشي بالنسبة لفستان العرس .. لأنه الفلوس اللي عندي ما كفت ..
أما عن التعديل يوم العرس فاللي سوتلي الميكب كانت حاطتلي جدول قبل باسبوعين كل يوم اسير اسوي عندهم شي .. وكانو مسوين بكج للعرايس بأسعار رمزية جدا .. اذا كنتي من راك ممكن ادلج عليها وتشوفين شغلها أو تسألين عنها .. بالنسبالي حسيت شغلها حلو وتعدلت عنها فالملجة وفالعرس