السلام عليكم ورحمه الله وبركاته
شحالكن خواتي الغاليات وعساكن بخير….؟
ماعرف اضبط الاستيك ماعرف شو السبب مرات استخدم السكالاوب بس يطلع عص يابس ماينكل ومرات شرايح الاستيك اخذهن من الجمعيه بس بعد نفس الشي ماعرف يمكن لانه يقصهن رفاع!!
ماعرف شو تشوفوون افضل اخذ شرايح سميكه واجرب اطبخهن او شو الجزء اللي فالعجل تكون لحمة طريه وقليله الدهن…! ع فكره ان اخذ اللحمه الهبرا (مافيها اي دهن) بس بعد ماتضبط ويايه خخخخ
واذا ممكن شو الصلصات اللي اقدر اسويها للستيك
احين نرد للكبد
مادري ليش كل مااطبخ الكبد يطلع منها دوم مع اني اغسلها عدل وليش تطلع فيها ريحه <<< بو الشباب يحب الكبد اطبخ واخر شي احس به ماياكل منه والسبب مب ضابطتنه
شو الحل 
كيف اقدر اطبخها واضبطها 100% واللي عندها طريقه للكبد حلوه ياريت تخبرنا
والسموحه منكن..
وانا بعد حابه استفيد من البنات اللي عندهن خبره..
الكبدة:
المكونات: بصل – ورق الغار- بهارات – ملح- زيت
الطريقة: يقطع البصل جوانح ويقلى مع الزيت قليلاً لمدة دقيقة ثم توضع الكبدة بعد تغسيلها جيدأ جداً وتوضع 4 ورقات من الغار (لإعطاء رائحة زكية) ، يحرك المزيج ويغطى عليه لمدة 5 دقائق ثم يوضع الملح والبهارات المحببة ويترك المزيج على النار مدة 10 دقائق أخرى إلى أن يذبل .
يسكب في طبق التقديم ويضاف إليه قليلاً من زيت الزيتون، ويزين بورق الجرجير.
عن الSteak أهم شي في شوي الSteak انج ما اتجلبينة وايد .. يعني خلي الطبقة الأولى تنشوي عدل و بعدين جابيهة علي الصوب الثاني…بهالطريقة ما اتخلين العصارة اللى في اللحم تتطلع.. فيكون اللحم طري..
لازم اتشوحين اللحم على نار عالية .. لأنه النار الهادية تخلي الحم يطلع العصارة اللي فيه فيستوي يابس..
أما عن نوع اللحم فأطرى ستيك هو Tenderlion بس للأسف مش متواجد في كل مكان .. تقدرين تستخدمين Scallop بقر العين الموجود في الجمعية.. اطلبي من اللحام ايقطعة قطع سميكة.. و انت في البيت دقيه للسمك المطلوب ..
الدق يفتت الأنسجة اليابسة اللي في اللحم..فيطرري اللحم..
الخل و اليمون و الروب بعد يعطون نفس النتيجة .. استخدميهن في نقع اللحم إذا بتغطينه بالبقسم و اتقلينة..
أخر شي هو الSauce اللي ايسمونة Gravy ..بعد ما اتشوحين اللحم .. استخدمي نفس الطاسة بدون غسيل.. حطي شوية ماي .. ربع جلاس.. و خلي يغلي عشان يستوي لونة بني من بقايا تشويح اللحم.. بعدين زيدي قشطة و ملح و فلفل..
هذا الأساس .. في وصفات تتضمن المشروم ..Mushroom Sauce
و في وصفات تتضمن فلفل أسود مجروش (مب ناعم) و ساعات فلفل أسود فرش مب مجفف..Pepper Sauce
اتمنى أكون ساعدج..
يعطيج الف عافيه الغاليه لى المجهود ………