للي يموتون في الشهر مره من عذاب والالام الدورة الشهرية

السلام عليكم ورحمة الله وبركاته

أخواتي والله ما عرفت وين احط موضوعي هذا
بس أتوقع ان هالقسم مناسب له بإذن الله

في الحقيقة أنا مستغربة إن للحين فيه بنات و حريم ( يموتون ) أول ايام الدورة الشهرية؟
يمين بالله اني صرت استغرب يوم اسمع البنات في الجامعة للحين يسولفون في هالموضوع و يشيلون همه و منهم اللي تغيب عشانه يوم و يومين عن المحاضرات و لو جات للجامعة طول اليوم و هي منقعة في العيادة

يمكن لأني تخلصت من هالعذاب من سنييييييين طويلة فصرت احسب ان الناس كلهم مثلي

بنات لو فيه كلمة ممكن انها تعبر عن الحالة اللي كنت امر فيها زماااان كل شهر مع الدورة الشهرية أكثر ملامسة للواقع من كلمة ( موت ) كان ما تأخرت بكتابتها !!

لأني بالفعل كنت اموت بدال المرة الف و أجلس اشهق و ألم اسرتي كلها حولي كأني أنازع مو كثر الألم و الغم و الكرب اللي كان يصيبني

ياااااه على ذيك الايام الله لا يعودها .. والله العظيم اني اتذكر حالي و ابكي بس الحمد لله على كل حال المؤمن مبتلى و بإذن الله انه كان تكفير لذنوبي

لكن هذا مو معناه اني ما اطلب العلاج و اترك جسمي و روحي رهينة الألم عشان اكسب أجر .. هذا يصير اسمه غباء و تخلف و ربنا يحاسبنا عليه

المهم ما اطول عليكم أنا يا طويلات العمر في مرة من المرات كان يوم عرفة و صادف اول يوم لدورتي هالكلام من قبل 8 سنوات تقريباً اللهم لك الحمد و المنة

وصل فيني الحال من الألم لدرجة ماهي طبيعية صرت اصارخ بكل ما ربي اعطاني من صوت و ابكي بشكل جنوني وامي و خواتي و اخواني كلهم حولي يبكون و هم حاطين في بالهم انه مافي شي ممكن يتقدم لي بهالحالة يعني المفروض انه أمر طبيعي و لكن لما جا والدي من الصلاة و شافني على هالحال قال لأمي لبسيها لازم يكون فيه علاج لهالسالفة مستحيل نترك البنت كذا

و لبستني و شالني اخوي الكبير ربي يحفظه و ودوني الطوارئ و هناك عطوني مسكن و ركبوا لي محلول و كتبولي على اشاعة تلفزيونية و تحاليل لها اول ما لها آخر يقول الطبيب احتمال يكون عندها تكيسات على المبايض

و سويت كل شي و ما طلع عندي شي و لله الحمد و قالوا خلص ما نقدر نسوي لك شي و لا تاخذين اسبرين مسكن لأنه يسبب سيولة في الدم و المشكلة الفيفادول ما كان ينفع معاي ابد و لا ذيك الحبوب الحمرا الشينة اللي كانوا يصرفونها لنا بالمدرسة

لكن الشهر اللي بعده جاني ألم اضعاف اضعاف اضعاف اللي قبله قام ابوي اخذني لمستشفى خاص كبير و صادف ان طبيبة النساء و الولادة زوجة صديقة قام شكالها الوضع بكل تفاصيلة
و الله ما انسى جميلها علي طول عمري للحين كل ما تذكرتها دعيت لها بظهر الغيب
هي يومها ركبت لي محلول اختفى معه الامل بشكل نهااااائي و قالت هالشهر خلاص عدى على خير لكن بداية من الشهور الجاية فيه علاج بسييييط بكتب لك اياه لازم تستخدمينه بتعيشين معاه حياة طبيعية 100% و لا عاد بشوف وجهك في المستشفى بعد كده هههه

و كتبت لي على أقماع ( تحاميل شرجية ) اسمها ( فولتارين voltaren 100 mg )

هي علبة زي كذا شكلها بس طبعا الحجم لازم 100 ملجرام

تستعملين تحميلة وحدة فقط كل شهر يجي فيها 5 اقماع و سعرها تقريباً من 18 – 25 ريال ( كل مره اشتريها بسعر مختلف )

يعني تكفيك لـ خمس شهور بالتمام

والله يا بنات و الله و احلف لكم بعظيم ان يوم الدورة صار يوم عادي مثله مثل اي يوم ثاني لا آلام لا عصبية لا إكتئاب لا غثيان لا فقد شهية .. بل على العكس تحسين نفسك مسترخية جددددداً و في سلام تام مع روحك <<< كوفي عنان على غفلة

أدري بعضكم بيقول صعبة التحاميل مقدر عليها لكن والله وجع ثواني و لا موت يوم بأكمله .. غمسي التحميلة في شوية زيت و سمي بالرحمن و ما بتحسين بشي بإذن الله .. بتحسين بشوي حرارة لثواني و رغبة عارمة في التبرز و انتم بكرامة لكن اول ما تدخلينها اجلسي .. و كل هالشعور المزعج ما بياخذ ربع دقيقة و اقل .. طبعاً خذيهاأول ما تحسين بنزول الدورة أو على حسب نوع آلامك يعني بعضكم يجيها الامل قبل الدورة و بعضكم اول ما تنزل الدورة .. لو كان الالم قبل الدورة حاولي تاخذين اقماع أم ( 50 ملجرام ) بتجيكي في العلبة 10 حبات خذي قمع قبل الدورة و قمع اول ما تنزل لك الدورة و بيصير المجموع 100 ملجرام

على فكرة انا سألت اكثر من طبيب و طبيبة و جراح و اطباء نساء و ولادة و كل شي و قالوا لي مامنها ضرر لو جلستي تستخدمينها طول العمر بإذن الله دامها اقماع مو حبوب و تعتبر الجرعة بسيطة دامها كل شهر مرة ..لأنها عبارة عن مسكن يهدي تقلصات الرحم اللي تكون سبب في الالم و يهدي الأعصاب

و لا تنسوني من دعواتكم ربي ييسر اموركم يا رب

الموضوع منقول