قائمة أغراض الريال للحج أو العمره

بنات اللي تبا ترتب شنطة الريال للحج أو العمره هذي اللسته اللي أطبقها دايما

*** حق الريال حطيله ( أهم شيء الأدويه ) إذا يعاني أو يستخدم أدويه يوميه
– سجادة الصلاة .
– أدوات النظافة بودره للجسم غير معطره + شب للعرق أحسن شيء + صابون للجسم + صابون لليد + شامبو + ليف للجسم مثل اللي في بودي شوب + مقص أظافر + مكينة الحلاقه ضروريه + مقص + فرشاة أسنان + معجون + سواك + مشط + أعواد تنظيف الأذن
– الملابس الداخليه حطيله مثل الوزره و الفوانيل على عدد الأيام اللي بيلبسهن لكل يوم غيارين
– ملابس الأحرام على عدد الأيام و 2 أحتياط يمكن يتوسخ أو يبغي يغير يعني على حسب طبع ريلج تشوفينه كم يبا يبدل
– الكنادير بعد على عدد الأيام وزياده أحتياط يعني إذا هوه من النوع اللي يغير وايد حطيله حسب رغبته ( لبعد و قبل الأحرام ) و الطرابش و البزم اللي يحتاجهن مع ملابس العيد
– جلاليب للنوم + مناشف للجسم
– غتر و قحافي أو عقله ( لبعد و قبل الأحرام )
– شبشب للحمام + نعال جلد لأن الشامواه يتوسخ
– فحم + عود + كم عطر ( لقبل وبعد الأحرام )
– كريم فولتارين + بنادول + مناديل ديتول + كريم لحروق الشمس هذا احتياط + علبة كلينكس صغيره + أكياس الكلينكس اللي تنحط في الجيب عمليه يوم بيكون خارج السكن
– تمر + بسكوت + كاكاو هوه يحبه + بسكوت مالح لحالة الضروره + فيتامين سي + مكسرات واايد يحبونها الرياييل ( نسكافيه أو قهوه عربيه )بس بدون زعفران أنتبهوا تحطولهم لأنه من الطيب
– شنطة صغيره تيج حوالين الخصر أظن أسمها boom bag
– مصحف صغير + كتيب لأدعية الحج و العمرة + كتيب لمراحل الحج
– كيس للنعله كرمكم الله يحطه على جتفه عند الطواف أو السعي
– شدة أكياس للملابس المستعمله أخذيله أقياس xl أنا لقيت في الجمعيات قسم الأكياس لحفظ الطعام المثلج يتسكر فنان بصراحه
– ياخذ معاه تيلفون جديم أحسن + الجرج + أرقام بطاقات من السعوديه
و طبعا لا تنسون تسألونهم إذا يبون شيء معين ياخذونه معاهم

دعواتكم لي الله ييسر لي أمري كله و يشفيني

حبيت اسأل عشان الحريم شو احسن وعملي في الحج عباية الرأس او الكتف؟؟؟

اكثر الي يلبسون راس بالحج يلبسون كتف عشان الزحمه وخلي عباتج لين ريلج ما تكون طويله ابدا ولبسي زلغه

ولا تلبسين غشاوي طويله من ورا