السلام عليكم ورحمة الله وبركاته. الحمدلله في منتصف شهر سته رزقت بطفلي الاول يعني الحين عمره شهرين الله يحفظه. مشكلتي هي اني اول اسبوع ماكان فيني حليب ووولدي وايد يصيح وماينام لانه يوعان فنصحني خواتي وقريباتي اني اعطيه مرضعه وبالفعل عطيته والحمدلله خف صياحه وتعدل نومه بس كنت اعطيه فالليل المراضع وطول اليوم انا ارضعه. ومحد كان يقولي شي اوينصحني وانا توي اول ياهل ماعرف شي. وللاسف بعد ثلاث اسابيع تم ولدي يصارخ من اعطيه من صدري ويدزه ويسكر حلجه ومن اعطيه مرضعه يسكت. ماعرفت شسوي احاولت ايوعه عشان يردلي وماشي فايده ومرت الايام وبدا ينشف الحليب اكثر واكثر وبدا كل حد يشوفني يحسسني اني ام مهمله وني ماخاف ربي اعطيه صناعي واللي يقولي تراه مابيعيش بالصناعي ومايغذيه عدل ونتي تتدلعين وحرام اللي تسوينه. وانا يعلم الله اني ماخليت شي ماجربته وياه حتى عن اخصايه الرضاعه رحت وقالتلي تمي شفطي وبيدر الحليب بس للاسف ماشي فايده. انا اللي معور قلبي انه نفس الناس اللي نصحوني اعطيه مرضعه الحين يالسين يلوموني فيه. وينهم قبل ليش ماقالولي انه لو خذ المرضعه بيودرج. وكل ما ادش موضوع واقرا فوايد الرضاعه الطبيعه قلبي يعورني اكثر. كله احس اني يالسه اخرب صحة ولدي. والىم نفسب اني يالستي ماعطيته المرضعه. مرات اقول حسد لني ثاني اسبوع بدا يدر فيني الحليب وماكان يودرني من كثر مايرضع وانا ارضعه جدام اهلي وقرايبي بس واخر شي قررت اخذ الحبوب المدره للحليب واشفطله واعطيه حتى لو مرضعه ع الاقل فاليوم. بس فاجئتني الدكتوره انه هالحبوب ممنوعه عاد ماعرف صدق ممنوعه ولا ماتبا تكتبلي اياهن ،وخذتله الحلمه السيلكون اللي تنحط ع الصدر يزخها دقيقه وعقب يتم يصيح مايباها،، وماعرف شالحل ي خواتي ساعدوني مابا ايأس عمره شهرين هو الحين ابا حل. كله ولا صحة ولدي
مب مشكله حبيبتي لا تتحسسين ولاتلومين عمرج وايد اطفال نفس الشي ومب شرط انج عشان عطيتيه مرضعه هو مايبا صدرج ترا مرات الياهل من نفسه خلاص يتعود ع الصناعي لو عقب شهور ومايبا حتى لو امه رضعته طبيعي فالبدايه ،،
حاولي تشفطيله وتعطينه حليبج بالمرضعه ،، والله اييسر امرج حبيبتي
اختي لاتحاتين وتلومين نفسج اهم شي اتحلين المشكله انا اشوف بعد تشفطين له واتحطينه فالمرضعه فكره ممتازه حاولي اختي
عادي يأختي فيه أطفال بروحهم جييه يفضلون الصناعي على الطبيعي .. بخصوص حالتي عندي بنوته من ربيت فيها ما عطيتها صناعي لين بعد الأربعين بروحها ما تبي ترضع بدون سبب حتى لو يوعتها بعد ما تبي .. و فالمقابل عندي بنوته ثانيه من ربيت فيها كل يوم أعطيها مرضعه وحده قبل الرقاد ولين الحين عمرها تقريبا سبع شهور وعادي ترضع طبيعي ..
لا تحطين ف بالج ولا تزعلين ولا تتضايقين .. عيشي حياتج دام هو حاب المرضعة خلاص عطيه و ارتاحي .. واللي يقولج مناعته تكون ضعيفة ويمرضون بسرعه .. من تجربتي ما حسّيت بهالشي الحمد لله عيالي كلهم نفس الشي اللي رضعوا طبيعي و صناعي ..
لا تزعلين وتضايقين ف عمرج وتسمعين كلام الي حولج الي ينكدون عليج ويلومونج انا بنتي من ربيتها شربت صناعي ولين اليوم والحمدالله عمرها ١٠ شهور وهي عالصناعي و الحمدالله مافيها الا العافيه شو بتسوين لو صدرج مايدر حليب مجبوره تعطينها صناعي وخلج طبيعيه ولاتضايقين اهم شي النفسيه صدقيني وكليها ل رب العالمين
لا تضايقين فديتج و الحليب الصناعي اللحين مدعم ومن شركات عالمية ان شاء الله االبيبي الثاني ترضعينه رضاعه طبيعيه ، لا تحطين عبء على نفسج اهم شي اهتمي في صحتج وصحة ولدج
إشفطي و عطيه
ما عليج من كلام الناس – خل يجوفون حالهم اول
اقري على عمرج و على النونو و الله كريم – الزعل مب زين للحليب
زيدي من الرهش و الحلبة و اشفطي كل ساعتين و بعد جربي تعطينه صدرج بين فترة و الثانية