شو تنصحوني البس في العيد .

حبيباتي انا بعييد في لندن ان شاء الله مع ريلي وودي اكون غير اول يوم عيد وباه يتفاجئ

شو تقترحون علي البس ؟؟؟؟ يعني ابا لبس للفندق ولبس للطلعه

مادري انا فكرت قبل لا نطلع من الفندق البس فستان قصير جي و مع صندل كعب اللي عليه سيور

واكسسوارات

وللطلعه شو تنصحوني عباه ولا البس كوت وبدله وشيل الوان لأن الجو بيكون بارد واحس بالعباه يكون شكل الوحده مبهذل

لأني كنت ادرس هناك وما عمري لبست العباه صراحه وكل البنات اللي كانو معاي ما كنو يلبسو عباه

لأنها مب عمليه مول في الحركه مع المطر والاجواء ما تساعد

طولت عليكم بس حبيت اخذ ارائكم

واللي بتعلق تعليق ثقيل احلفها اتخليه حق نفسها احسن وما ابا اراء تغث لو سمحتو

ولكم مني ارق تحيه

و الصبح خلي اللوك فرش يعني فستان الوانه فرش احمر مثلا و ورده حمرة على ينب الشعر (حركات)

لبرع .. حتى انا ما ألبس عباه لكن ألبس مستور ,, اممم شوفي حطي اسكارف و شال للرقبه طبعا بيكون طقم مع القفازات الخفيفه

و البسي جاكيت جلد خفيف و طويل و جينز ازرق و كعب راقي او جوتي سبورت بو فصوص .. وشنطه من الي طوال توصل الين الخصر .. و بتظهرين استايلش و طر

واذا ما بتحطين اسكارف و شعرج هب طويل حطي كاب شعر شتوي ف لما تلفين الشال ع رقبتج بتكونين ساتره كل شي

وحرم سموه دخلت في بالي حركة القفازات والسكارف على رقبتي

Girl عيبتني فكرة الفستان يكون احمر وتسلمين على الدعاء

مشاركاتكم وايد فرحتني وافكاركم عيبتني وايد

وشو عن المكياج بنات والبس عدسات ولا ما البس بطبعي احب المكياج الطبيعي

يعني احط فل ميكاب بس يكون جدا طبيعي وما احط طبقات طبعا

وكيف عن لبس المطار احب اكون كاشخه في المطار