تعالن شوفن امي اشقايل ربتني ع حب القران من صغري تعالن استفيدن يا امهات .

قبل شوي تميت اتذكر ايام كنت صغيره كنت ماسكه القران اقرى ويوم سكرت ظميته وتذكرت ايام طفولتي

يوم امي كانت اتنومني جمبها ربي يحفظها وتم تتلو القران بصوت عالي وانا كنت بعدني 4 سنوات او 5 يعني بالروضه

وكنت وانا نايمه اسمعها ومن كثر ما اسمعها بطريقه يوميه وبعد كل صلاه تقرى القران بصوت عالي

حفظت بعض السور ومب كلها طبعا بس سبحان الله يوم ايي عند ايه اتم اقراها بدون ما اطالع المصحف

لني خلاص تعودت عليها

مثال سورة الكهف ومريم وسورة الواقعه والرحمن وسورة البقره الجزء الاول وبعض من السور الاخرى

وكل هذا طبعا بفضل امي الله يحفظها لي

المهم غالياتي

اتذكر امي كانت تحب تقعدني وياها بالحوي مال بيتنا واتذكر اتجيب الكرسي وتقعد عليه وتمسك يديني الثنتين وتظمهم لصدرها وكنت حزتها بالروضه او اصغر ما اتذكر بالظبط

ويوم تظم يديني لصدرها اتم تقولي ايه من ايات القران هي وايد تحبها في سورة النور

وهي

بسم الله الرحمن الرحيم

الله نور السموات والارض مثل نوره كمشكات فيها مصباح المصباح في زجاجه الزجاجة كانها كوكب دري يوقد من شجرة مباركه زيتونه لا شرقيه ولا غربيه يكاد زيتها يضيء ولو لم تمسسه نار نور على نور يهدي الله لنوره من يشاء ويضرب الله الامثال للناس والله بكل شيء عليم

صدق الله العظيم

كل يوم كنا نقعد بحوي البيت وتمسك يديني وترددها وتخليني اقول وراها لين ماحفظتها صم

يوم دخلت صف اول ابتدائي كانت ادرسني ابله اسمها سميره كانت وايد طيبه وتشوفني مستحيه وايد كانت تحاول تتقرب مني

ومره يت تسمع لنا ايات فقالت لي دورج يالجوهره سمعي فانا فجاه قلت لها هذي الايه اللي امي حفظتها لي اندهشت مني ان كيف بنت عمرها 6 سنوات حافظتها وسيده خذتني عند المديره وقالت سمعي للمديره وسمعتلها الايه والمديره استانست وايد كنت اول طالبه في ابوظبي في صف اول ابتدائي تحفظ ايه من هالايات وبالترتيل ولا غلط فيها ولا غلطه

المهم يت مسابقه دينيه في مدارس ابوظبي وابله سميره رشحتني والمديره رشحتني وكنا نقعد بمسيد المدرسه نسمع للعصر عسب المسابقه وكنت ارقد عريولها فديتها

لين ماجا وقت المصابقه وسمعت وطلعت الاولى عمدارس بوظبي كلها بسم الله ماشاء الله واهلي كلهم استانسو واولها امي ماكانت تدري ان يوم خلتني احفظ هالايه ان جي بستوي وراح اخذ جائزه وهذا كله بفضل الله ان رزقني ام شرات امي

نزلت لكم خواتي هالتجربه عشان تعودون عيالكم عالقران من صغرهم لما يكبرون راح يحبونه مابيحسون بصعوبه في حفظه بالعكس راح يتعودون ويتسابقون للحفظ

وسبحان الله انا للحين يوم اشوف امي ماسكه القران وتقرى احب اقعد جمبها واسمعها لن خلاص صار شي بداخلي ما اقدر اتركه

وامس امي فديتها قالت لي سر ماكنت اعرفه قالت يابنتي اللي حبج في القران اكثر ان انتي من يوم ماكنتي في بطني كنت امسح بديني عبطني واقرى قران بصوت عالي لن الياهل داخل بطن امه يسمع امه شو تقول سبحان الله

ان شاءء الله هالشي يفيدكم يا امهات يا حبيباتي

ودعواتكم لامي بطولة العمر لن هي تاج راسي ونبراسي وساسي وكل ناسي

بارك الله فيج وجعله فميزاااان حسناتج إن شا الله

ماشي وقت يا دوم يلحقن عالفرض

ماشي وقت يا دوم يلحقن عالفرض

الله المستعان