شحالكم خواتي
ابا اعرف من بنات العين اللي خذوا الليسن قريب كيف قدمتوا على الليسن وشو الاوراق المطلوبة وكم كلفكم فتح الملف والمدرسه اللي درستوا فيها قبل ما تسيرون مدرسة تدريب السواقه ومدرسة تدريب السواقه الساعه على كم عندهم واذا راح اييكم للبيت بكم راح يحسوبنه حقج وشو احسن مدرسه لتعليم السواقه
بارك الله فيكم لا تطنشوني وردوا عليه لاني ابا اقدم ومب عارفه شي
هلا عزيزتي ..
وعليكم السلام ورحمه الله وبركاته
أنا خذت الليسن من سنه تقريباً ..وما أذكر بالضط الأسعار بس بحاااول
أول شي سيري المرور ويا ولي أمرج لااازم …عشان يوقع على الطلب ..
بتفتحين ملف واظني بياخوذن عليج 100 درهم …ويبون عليج صوره شخصيه وصورة جواز السفر وخلاصة القيد …وبيسون لج فحص نظر ..في نفس المكان …
وبعدين بتسيرين مدرسة الامارات لتعليم قيادة السيارات بالاوراق اللي خذتيها في المرور …عشان تسجلين في الصف ..وتدفعين اظني 850 اممم وتدرسين 4 ايام تبين المسا والا الصبح ع كيفج …
وعقب بيمتحنونج نظري اسئلة سهله بس ركزي مع المحاضر وهو بيقلوج شو بيي في الامتحان …^^ يحليله السوداني طيب واايد ……….
وعقب اذا نجحتي ردي المرور ..مع شهادة النجاح في التعليم النظري من المدرسة وخذي موعد ريوس وباركنج …
خلال هالفترة يعني قبل موعد الامتحان العملي ريوس وباركنج …خذي تدريب بالسيارة في المرور هناك منطقة خاصه لهذا الشيء …
ويفضل تتعاقدين مع مدربة ارخص من المدرسة نفسها لأنه عندهم مدربين بعد هم ..واذا تبين بعطيج رقم وحده وايد زينه …
وعقب ما تنجحين ان شاء الله بيعطونج موعد الشارع اذا نجحتي بتاخذين الليسن واذا رسبتي تجددين الموعد مره ثانيه …
طبعا المدربه بتخبرج بكل شي وين تسيرين ووين تين … واتفقي معاها بالساعه تدريب …أحسن لج ..
وبس …
على فكرة مدرسة الامارات لتعليم السواقة موجوده في منطقة الطوية ..فلا خاصه …عند دوار حديقة الطوية بالضبط …..
والمرور في فلج هزاع …
وموفقة ..
ما قصرت ام الخليفي 
موفقة
مشكوره اختي ام الخليفي ما قصرتي بارك الله فيج ممكن رقم الحرمه اللي علمتج ع السواقه
إني أسألك نعمة دائمة ,,
تفيض بها خيراتك ,,
وتتوسع بها أرزاقك ,,
وتتضاعف بها بركاتك ,,
وتزيد بها أفضالك ,,
وأعوذ بك ,,,
من أن تزول عني نعمك ,,
وتنقص عني خيراتك ,,
وتنقطع عني أرزاقك ,,,
وتنتهي عني بركاتك ,,
وتذهب عني أفضالك ,,,
اختي الله لا يهينج ممكن رقم المدربه ع الخاص
راعيه الموضوع ربي يوفقج ويسهل علييييييج يارب