اللهم لك الحمد ولك الشكر بعد صبر سنوات حملت بفضل من ربي تعالوا باركولي ^_^

اللهم لك الحمد كما ينبغي لجلال وجهك وعظيم سلطانك حمدا كثيرا وشكرا كثيرا

خواتي الحبيبات باركولي .. أخيراااا بصير أم أخيرا حملت بعد صبر سنين وعذاب مايعلم فيه الا الله سبحانه … أخيرا أنعم الله عليه بالحمل الحمدالله .. اللهم ماعبدناك حق عبادتك ماشكرناك حق شكرك .. لك الحمد ولك الشكر ولك الفضل وبيدك الخير كله ..

خواتي الغاليات انا تأخرت عندي الدوره وكنت خايفه الصراحه انها تنزل وماطلع حامل بس إيماني بربي ودعائي وقرآني هم اللي كانوا مصبريني ومخففين عليه … المهم بعد مرور 8 ايام على انقطاع الدوره قررت أني اسوي التحليل المنزلي واللي ياما طلع سالب وعقدني .. بس ها المره غير كان في شي يقولي توكلي على الله … لا تخافين ….. بأذن الله حامل …. يمكن ياني ها الشعور لأني حسيت فعلا ببعض التغيرات اللي ماحسيتها طول ها السنوات اللي مرت .. صح حسيت بأعراض دوره بس كانت وياها أعراض ثانيه ما قد حسيتها من قبل وها الاحساس هو اللي خلاني اتشجع وحلل

المهم قمت انا وريلي حق صلاة الفجر ودخلت عزكم الله الحمام علشان اتوضأ وفي نفس الوقت أسوي التحليل وهنيه كانت الصدمه .. طلعت النتيجه إيجابيه .. طلعت حــــــــــــــــــــــامل … يااااااااااااااااااااااااه ما تتخيلون كيف كان شعوري .. معقوله بعد هالسنين حملت ؟ بعد ها الصبر والعذاب أخيرا انا حامل … اللهم لك الحمد كما ينبغي لجلال وجهك وعظيم سلطانك حمدا كثيرا وشكرا كثيرا ……..

أنتظرت زوجي يرجع من المسيد على أحر من الجمر وفي ايدي نتيجة التحليل .. ومن دخل من الباب ناديته وهو طبعا كان يحاتي وكان خايف مايطلع حمل .. زقرته من فوق بوووووو فلان … يوم سمع صوتي وانا اقوله بو فلان وهاذي اول مره اناديه بها الطريقه وقوله بو فلان … ياني طاير وهو يقولي من صدقج انتي حامل؟؟؟ لالا؟؟ قلت له والله انا حامل وتعال شوف النتيجه وعطيته جهاز لختبار وماتتخيلون فرحته فديته ربي يحفظه ويخليه لي .. وها اللحظات كانت اسعد لحظات بحياتنا … طبعا انا سويت لختبار أمس يوم الخميس وبأذن الله يوم السبت بسير حق الدكتوره علشان تعطيني فيتامينات ومثبتات وها السوالف علشان البيبي ^_^

أدعولي حبيباتي ان ربي يثبت حملي ويفرح قلبي بشوفة ضناي .. واباكم تقولولي شو اسوي الحين شو الاشياء اللي أمتنع منها وشو الاشياء اللي آكلها لان هذا اول حمل لي وانا ماعرف شي

وبأذن الله بعد فتره بنزل موضوع ثاني وبخبركم فيه كيف حملت وشو الاشياء اللي ساعدتني على الحمل لان ريلي ما نعني من الاب توب ومايباني ايلس عليه وايد ..^_^