هلا وغلا ..
شخباركن …؟؟
الغاليات بغيت مساعدة بخصوص الميكب …
ناوية اشتري نيوو ميكب .. واغير كل اللي عندي ^.^
عاد انا ميكبي الجديم مشكل من كل ماركة .. ماك ومكس فاكتور وميكب فور ايفر وغيره
حاليا ابااا افضل الماركات لآفضل ميكب ..
فياليت تخبروني بأفضل ماركة للتالي :~
– الفاونديشن
– البودرة ..( شو الاحسن المضغوطة او العادية )
– الـ loose powder ( هاي لشو استخدامه غير انها تعطي اضاءة ؟ )
– الماسكارا
– البلاشر
– الكحل
واللي بتزيد يزاها الله خييير ^.^
ودي اجدد وماودي اخبص خخ
فـ بليز هيلب مي ….. خصوصا الماكييرات =)
فديتج من كم اسبوع اختنا وثير كانت طارحه نفس الموضوع ووايد طولت معاها انصحها بشو الي حبيته من تجاربي للمكياج ((تراني طحت في هالعالم من كنت 13 سنه ))
1- البودرات : مافيه احسن لحد الحين من بودرات مااااك النوعين التاليين مينيرالايزد سكن فينيش ناتشورال هذا روووعه يالله تغطيه مع لوك مخملي طبيعي ينفع للمناسبات ولكل يوم والنوع الثاني ستيديو فيكس فاونديشن تغطيته قوووية اقوى بودره في التغطيه لحد الان
ما انصح بالبودرات المائية لانها صعبه بالاستخدام ووايد تنشف البشره بالذات للبشره الجافه او المختلطه حتى لو تستخدمينه فوق بيس او كريم اساس بعد تشقق
كريمات الاساس اي كريم اساس ينفع ونصيحتي خذي الي تغطيتهم خفيفه لين متوسطه لا تاخذين التغطيات الثقيله لانها بتتعب بشرتج وبتحبب لانها تسد المسام فتتجمع الافرازات داخل او تحت الجلد وتصير لج حبوب صغيره مثل التعانين بتخوز بعد كم يوم او لو ويهج قابل انه يسوي حب شباب بيستوي حبوب شباب بالهبل بالويهه ومن الماركات قوم لايف ستايل الي هم ان واي اكس وبرستيج وبرجوا لو حصلتي نفس درجتج جربت من ماركات المعارض اوفيس وفورايفر52 وااايد عيبوووني وميك اب ستيشن حلو بعد ونصيحه لالالالالالازم تجربين كريم الاساس من فورايفر52 المعصار يالله تغطيته متوسطه لكن لوك مخملي وهو احسن كريم اساس شفته لحد الحين الي تقدرين تحطينه من غير ما تثبتينه بالبودره
الاي شادوات لج كل الماركات بس حاولي تاخذين البلتات بدل ما تيمعين لج مليون حبه وتتوهقين وين تحطينهم ويوم تحطين مكياج تدورين على لون لون وعاد لو خذيتهم في علب ماشفافه قعدي دوري وفتحي علبه علبه لين ما تحصلين اللون الي تبينه
عن نفسي انا عشقي البلتات لانهم ياخذون حيز اقل واسهل انج تشوفين كل الالوان جدامج حتى الحين صرت اقلع الاي شادوات من علبهم والصق عليهم مغناطيس واحطهم في بلتات ماك
احسن الاي شادوات بن ناي وكريولان الاكوا كلر بس يبالج تكونين ماهره في الدمج في اي شادوات مائية وماك و ان واي اكس وكوستال سينس وفيراروتشي البلتات وميك اب فورلايف هذا عجب الصراحه وما ببالغ لما بقول احسن عن ماك فخلج ذكيه وشو تسوين تاخذين الالوان الاساسيه من الماركات الارخص من قوم فور لايف وفيراروتشي البلته رقم 01 روعه الصراحه الي تييج على طابقين او اي ماركه ثانية تشوفينها حلوة لما تجربين التستر وباقي الالوان الغريبه والي تقلب على لونين والي ما تحصلينها الا بالماركات الكبيره خذيها من هناك مثلا ماك وكريولان وين ناي يطلعون الوان حلوة ما تحصلينهم في ماركات ثانية جربت بعد ايلف وايد حلوين وماركه يديده طالعه اسمها راج باني راج واايد رووعه هالماركه شبيه بماك اي شدواتهم خطييييييره اول ما طاحت اسعارهم كانت بالتراب خذت الاي شادو الواحد على 45 والحين الواحد على 90 درهم بس صدق كواليتي عالي بتحصلينها مرات اشوفها في محلات لايف ستايل
اما الارواج نفس الكلام للاي شادو حاولي تاخذين بلتات والالوان الاساسيه من ماركات ارخص عن ماك مثلا فورايفر 52 وايد انصح فيها اوفيس يقولوا انها يابسه ما يمدحونها بس فيه كوليكشن يديد يقولوا انه كريمي بس ما جربت ولا شي منهم وروجات قوم لايف ستيال حلوين بعد نيفيا وماكس فاكتور واايد روعه الصراحه روجات ديور وجيفينشي ولانكوم كلهم نفس الكواليتي مال ان واي اكس الي في لايف ستايل الي ما يعجبي فيهم انهم وايد كريميين وما ينفعون لجونا بسرعه يسيحوا ويطيروا من الشفايف
بشكل عام ما احب ابد ماركات باريس غاليري ابد ابد ابد احسهم كلهم بودره ونتفه لون ويالله يالله يطلع اللون الي فيهم
باستثناء بعض المنتجات الي بالغلط يطلعونها حلوة واسعارهم وايد غاليه وابد مو بروفيشينال من باريس غاليري مري على بوبي براون والقي نظره على الفراشي الي عندهم واايد حلوين وعلى جيفينشي وديور الي احبه القلوسات الي عندهم والي بتحصلين تقريبا نفس الكواليتي ويمكن بعد نفس الالوان في لايف ستايل من برجوا يالله الحين مطلعين لج قلوسات وااايد حلوين اعتقد على 60 او 70 درهم الواحد يعني تقريبا صاروا نفس اسعار ماك
انجوليت قلوساتهم روعه وعلى 40 درهم باجي الاشياء ما لهناك عندهم ايه ايه عندهم اللوز باودر رووعه
البلاشر لا تروحين لا يمين ولا يسار سيري ماك ونااارس وفقط
هذا رايي فقط ومن تجاربي الخاصه تقريبا
صدق لا تاخذين من ماركه وحده ابد ابد ما انصحج وبالذات الماركات الي مو بروفيشينال لو بنصح بماركه وحده تاخذين منها كل شي سيري ماك لانهم تقريبا الكواليتي مالهم من اعلى الكواليتي من الماركات الي جربتها يعني قلوساتهم حلوة وروجاتهم حلوة وبودراتهم لا يعلى عليها البنجمت فنان والكحال الكريميه لو تخلينه مفتوحه طول اليوم ما تيبس اساسهم اييج بكل االالوان والتغطيات من خفيفه لين تغطيه كامله فراشهم معروفه بالكواليتي العالي بس سعره غالي حبه وبهالكواليتي انا اشوفه ابد مو غالي يعني فرشاه تاخذينه ب200 درهم واتم معاج 30 سنه بالنسبه لي هاي صفقه ما خسرانه فيها ^_^
سوري طولت وايد بس لو انا محتايه مساعده بتمنى اي وحده عندها خبره تقول لي كل شي وما تبخل علي وسويت هالشي لج ان شالله تستافادين ولكل البنات يستفادون والي تستفاد بس تدعي لي بتوفيق الخير ^_^
بعدها سألتني كذا سؤال غير وكانت هاي الاسئله مع ردودي
انزين حبيبتي…. لو اشتريت مكياج من الحين عااااادي؟؟؟ والا تو الناااس؟؟؟
عادي تشترين مكياج من الحين بس لازم تحفظينه في مكان جاف وبارد يعني غرفتج وفيه وايد بخبرونج انه له تاريخ صلاحيه ووهالكلام صح بس لو تلاحظين يحطون رمز ويرسمون علبه ومفتوح غطاها وداخلها مثلا 12 او 24 يعني هالعلبه صلاحيتها تنتهي بعد 12 شهر من وقت ما فتحتيها وانتي بتخلينهم ما بتفتحينهم لين بعدين يعني بنظري عادي
وبعدين في ماركات طرييتيهم انا ما اعرف اصلا وين يبيعونهم….
ياليت لو تخبريني كل ماركة وين بحصلها
خبريني شو من الماركات الي ما عرفتي وين ينباعون وبخبرج
——————————————————————————–
الغالية انا من عشاق الكحل الاسود والملوووون…. شو احسن ماركة تثبت وتبين داخل العييييين !!!
كحل داخل العين مالج الا ماركه برستيج من لايف ستايل هذا لحد الحين احسن كحل قلم لداخل العين عن نفسي استخدم الكحل الكريمي بالفرشاه لداخل العين اللون اقوى بالف من الاقلام ولو تبين ممكن تمريرن القلم على ولاعه اشوي عشان يدفا وتشخطينه بعيونج بيكون لونه اقوى
احسن ماركات الكحل الكريمية ماك الصراحه سهل بالاستخدام وما اييبس ايتم معاج لين ما يخلص وعندهم الوان تجنن وكحال كريمي من فورايفر 52 واايد حلوين بعد تقريبا كواليتي مشابه لكواليتي ماك بس ينشف عنج لو ما تغطينه عدل عدل عدل بس صدق حلو سهل استخدامه ولا يسيح ولونه قوي
وبالذات لو انج مدمنه على الوان كحال كريمية بتخسرين وايد لو خذتي كذا لون من ماك من ماك خذي الاسود مثلا وباجي الالوان خذيها من فورايفر 52 كل الالوان عندهم من الي تحبينه والي ما تحبينه واخذي الي تبينه اعتقد على 30 للحبه
وشو عن الماسكرا… ما طريتي شي بخصوصها؟
بالنسبه للماسكرا يمكن ما طريتها لاني ما اهتم فيها دومي استخدم الرموش في المناسبات واي ماسكرا لو استخدميها صح بتعطيج نفس الفعاليه والنتايج ومن الي جربتهم افضل الماسكرات من ميبيلين وبعدها ماكس فاكتور وبعدها ريفيلون ولا تفكرين تخسرين بيزاتج على ماسكرا ماك ما تنفع عندي اياها وااايد صعب انها تخوز لو تحكين عيونج بالصابون وبتم تذرذر تحت عيونج لعده ايام وبيسوي لج سواد تحت العين هذا العيب الوحيد الي ما حبيته بالماسكرا من كثر ما هي قوية اونهم ضد الماي من تطيح على رومشج ما بتخوز
وعن الكونسيلر ؟ شو افضل ماركة.؟
الكونسيلر كريولان تي فيه ستيك فاونديشن تغطيه قوووية كانها كونسيلر بالفرشاه تحكينه على الستيك فاونديشن وبعدها تحطينه بالفرشاه على بس الاماكن الي تبيه تغطينها
كونسيلر بن ناي بعد حلو وتغطيته قوية بس مشكلته انه كريمي زياده وبالتالي بيسيح بمعدل اكثر عن غيره مثل كريولاين
كونسيلرات ماك ما جربتها فما اقدر احكم عليها
ايه ان اواي اكس من لايف ستايل خبااااااااااااااال والله حبيته شفته من عند اختي وقمت خذت مثله على طول اليوم الثاني هذا ينفع صدق حق كل يوم ولا بيخرب لج بشرتج مثل قوم كريولاين وبن ناي هالثنين والله دمار للبشره تحملي منه بس للمناسبات وجربت البلته من فورايفر 52 الي خمس الوان في علبه ومثلها من فورايفر بعد حلو وتنفع لكل يوم بس تنشف البشره اشوي يعني ما تنفع للبشره الجافه ومن كوستال سينتس وايد حلو الكونسيلر ويل مالهم وبن ناي صح عندهم كونيسيلر ويل بعد حلو بس عاد وايد قوي الجلد
الايلينر؟؟؟ خخخخخ
عن نفسي بس استخدم ميبلين الكوليكشن القديم للايلانر السائل للاسف للحين ما يبيعونه خذت اليديد ابد ما عيبني مالهم والحين استخدم من فورايفر 52 واايد حلو وسهل بالاستخدام لانه ريشته يابسه اشوي
اما كحل قلم داخل العين مالج الا ريفيلون طبعا للحين مافيه كحل ما يسيح بالذات بجونا ولو استخدمتيه من غير بودره بيسيح وهالكحل سواده فاااااااحم اسود كحل جربته لحد الان (اسود عن جيفينشي ولانكوم وماك وبريستيج ونيفيا) وكريمي وايد يعني سحبه وحده على العين وشوفي كيف تتلون لج عيونج
ولانه كريمي فاتوقع انه يسيح اكثر عن الكحال الثانين بس انا مولية ما قط استخدمت كحل من غير بودره ما ينفع مول مول مول
وبخصوص الفرش؟ شو احسن مجموعة فرش كاملة اخذها؟
جاوبت عليج بالخاص ^_^
كان الجواب انه احسن فرش هم فرش ماك وبوبي براون وسيجما بالنسبه للفراشي الي شعره طبيعي طبعا اسعارهم غاليه ومو كل فرش ماك تاخذينهم في فرش ضروريه وثانيه ممكن تشترينها من مكان ارخص
سيجما حلوة فراشيهم ونااعمه بس لما اغسلها شعره او شعرتين يطيحن من الفرشاه مع اول غسله بس بالماي والصابون
وتبين نصيحه اخت مالج الا فراشي فورافير 52 الي بالرول الفضي هذول كلمه روعه اشوي عليهم اول شي نعووومه ما تتصورينها والله الحين صار لي سنه استخدمهم ولا شعره تطيح منهم مع اني اغسلهم بالماي والصابون بعد كل استخدام وفوق هذا شوفي السعر كيف 24 قطعه ب170 درهم فقط بالنسبه لي هاي صفقه مربحه لازم كل وحده تاخذها طبعا تاخذين الرول وتقدرين تاخذين باجي الفرش الي ما تحصلينهم بالرول من ماك وبوبي براون ولا سيجما انا جيه مسوية لانه حرام تشترين فرشاه الرول مال الحواجب من ماك على 200 درهم شو تبين فيها ما تنفعج مول وهالفرشاه لو لو فكرتي تستخدمينها بتكون عندج وكواليتي عااالي وبرخص التراب
اوووس لا تقولوا لحد لا يرفعون اسعارهم الحين الي يبيعون
وسؤال بعد بخصوص الايشدوووو…
اي ماركة اقدر احصل فيها علبة ايشدو كاااااااااااملة الالوان ..؟؟
اكبر عدد الوان شفته بعلبة وحده كان عند ماك … 15 لون بس…
ماتعرفين ماركة غير احصل فيها كل الالوان بعلبة وحده..
كوستاال سينتس 88 لون في بلته وحده ودامج برا البلاد حاولي تاخذينها من هناك الوانهم حلوه وثابته وعندهم كذا بلته وحده للالوان الطبيعيه 88 لون طبيعي وثانية 88 لون ملون بس مات و88لون ملون بس مخملي لميع
شوفي هالرابط اليوم سويت لوك باستخدام هالبلته شوفي كيف الوانها قوية http://forum.uaewomen.net/showthread.php?t=751231
المشكله انه الحبات صغااار واعتقد انهم بيخلصون بسرعه اعتقد مدري عاد
اما بلته ماك شو اسوي اشيل القطعه الي فيه دواير والصق اكبر عدد ممكن من الاي شادو وحتى لو ماكان ماك اييب مغناطيس والصقه وراه واحطه بالبلته
وعندج بلته فيراروتشي هاي الماركه تحصلينا بالمعارض والا محلات المكياج الي يبيعون هالماركات مال المعارض ادري اسألتي وايد بس ماعليه تحمليني …
مالي غيركم اسألكم …
ولا يهمج احنا نفيد ونستفيد بس اعتقد اني افيد اكثر لانه وايد بنات عندهم معلومات بس مدري خاشينها ليش ما يعطون ما يخبرونا يعني البنات الي عرسوا وش قد خذوا مكياج ومن وش قد ماركات بس محد يقولج تجاربه مدري ليش يعني حتى لو انا غلطت بنصح غيري عشان ما نغلط كلنا نفس الغلطه ونشتري منتج نندم انا خسرنا بيزاتنا عليه
ان شالله ان شالله يتشجعون البنات ويخبرونا عن تجاربهم اكثر ^_^
وبعدها اختنا وثير سوت ملخص لكل الكلام الي قلته وعدلت عليه وكان هذا الملخص
البودرة : ماك
الغلا هني رابط موضوع سويته فيه بودرات ماك الي حبيتهم الي هم ستيديو فيكس والمينيريلايزد سكن فينيش
http://forum.uaewomen.net/showthread…1#post23156291
كريم الاساس : واي اكس + برستيج+ بروا+ اوفيس+ فورايفر52 المعصار+ ميكاب ستينشن + ماك
شادو: بن ناي+ كريولاين+الأكواكلر+ كوستال سينتس 88 لون في العلبة + فيراروتشي + ماك اهم شي نسيتيه احلى اي شادوات بس مو كل الالوان لانها غاليين اشوي اللون على 55 لو تحطينه بالبلته على 79 لو اللون بروحه في علبه سوده فشو تسوين مثل ما قلت لج الالوان العاديه الي مات ولون عادي من الماركات مثل بن ناي ((لو تشترينه اون لاين او برا البلاد بيطلع لج اللون الواحد على 30 درهم مو هني يبيعونها على 55 درهم حاله حال ماك )))وفيراروتشي والا بلتات كوستال سينتس الالوان الي تقلب على لونين والغريبه عليج في ماك + راج باني راج ((بس هالماركه اول ما طاحت خذت الشادو على 40 درهم الحين رافعين السعر حول المية درهم بالضبط 94 درهم ولما قلت لها انا من شهرين خذت هالماركه على اربعين ليش السعر فوق قالت احنا هيك مرات بنزل السعر ومرات بنعليه قلت لها خير انشالله يوم بتنزلونه عيل برد اشتريه فتحملي تشترينه الحين))
شدو مائي: = اكوا كلر من كريولاين والالوان المائية من بن ناي + فورايفر 52 عندهم بلته فيها كذا لون مائي واايد حلو + ماركه اري جو نادر ما احصل هالماركه مرة بس شفتهم فاتحين محل بمعرض الجامعه وخذت بلته الوان مائية روووعه سويت فيها درس اللوك الفوشي هني
http://forum.uaewomen.net/showthread…3#post23159653
اي اي شادو ممكن تستخدمينه بالماي بس بس لو بللتيه بالماي ما راح تقدرين تستخدمينه عادي بعدها لانه بتتكون طبقه عليه وما بنمسح اللون على الفرشاه الا بالماي عشان جيه دايم لو بتستخدميه مائي خصصي جهه معينه لاستخدام المائي عشان ما يخترب عنج الاي شادو
الارواج: بلتات فور ايفر 52+ نيفيا+ ماكس فاكتور+ ديور+ جيفينشي+ لانكوم+ ماااك
جلوسات: جيفينشي+ ديور+برجوا الكوليكشن اليديد روعه على 60 درهم الحبه + انجيلوت ارووع وارخص عن برجوا على 40 درهم الحبه + ماك بس ما يرزا تدفعين هالسعر وموجود نفس الكواليتي عند انجيلوت وبرجوا
البلشر: ماك + نارس + بن ناي
كونسيلر: ميكاب فور ايفير بلتات + كريولاين+بن ناي + ايه ان واي اكس
ماسكرا: برجوا + ميبيلين+ ماكس فاكتور+ ريفوليون
كحل اسود: برستيج + ريفولين+ مكياجي
كحل كريمي: ماك + فورايفر
ايلينر: فورايفر 52
الفرش: الرول الفضي فورايفير 52+ماك لو تبين تخسرين بيزاتج ^_^ + سيجما برش تطلبينهم من النت + بن ناي رووعه فرشهم ياخي رووعه + ايلف روعه والسعر اروع بس الرول الفضي كاااافي ويغنيج عن اي فرش ثانية
هااااه.. .شو رايج اختي (علوه)…. لو عندج اي اي اضافات او ملاحضات او اعادة ترتيب حسب الافضلية…
عندي سؤال بعد بخصوص الشادوهات …
شو الفرق مابين الشدو البودرة والشادو المائي والشادو الكريمي والشادو اللماعي و… الخ..
لحظة خل اتربع السالفه يبالها شرح
شوفي الاي شادو فيه منه تصنيفات اول شي على حسب اللون نوعين Matte و Shimmer المات والشيمير
المات الي هو لون صافي ما فيه ولا لمعه والشيمير الي هو المخملي يسمونه هني فيه لمعه
وعلى حسب النوعيه فيه منه اللوز والكومباكت loose و compact اللوز يعني سائب يعني بودره يعني نثر بالفرشاه تحطينه عادي لو جربتي بنجمنت ماك حلو ولونه قوي ماشي فرق عن الاي شادو الكومباكت الي هو المضغوط … السائب ما احب استخدمه بروحه لانه واايد يتنثر ويطيح لج تحت العين ويلعوز لو ما عرفتي تستخدمينه صح
طالعي هالموضوع الي سويته في صورة لبينجمينت ماك هذا اللوز اي شادو والي بالعلبه مال مكياجي الكومباكت الاي شادو العادي الي نشوفه دوم
http://forum.uaewomen.net/showthread…7#post23220507
اما الشادو الكريمي هو نفسه الكحل الكريمي الي يكون كريمي تحطينه بالفرشاه هذا لونه يكون اعمق ويتم فترات طويله بس لازم تعرفين تستخدمينه ولازم ماركه تكون زينه يعني ما تحطينه منه طبقات عوده والا بيخطط لج مكان الجفن من فوق وصعب في الدمج فلازم تحطينه بالصبط وين ما تبين اللون قوي وبعدها تحطين فوقه الاي شادو العادي البودره وتدمجينه على كيفج شي ثاني لازم نوعيه زينه لانه عادي تاخذين نوعيه رديئة ويتيبس عليج ويكون صعب استخدامه او يكون كريمي وايد فيخطط لج جفنج وبيسيح عنج ولونه ما يكون قوي الي انصحه من بن ناي الي اييج في علبه دوارية ست مدري خمس الوان
هني موجود في هالموضوع ^_^
http://forum.uaewomen.net/showthread…0#post22424270
انا ما اعرف افرق بين الشدوهااات… لا من ناحية الشكل… ولا من ناحية طريقة الاستخدام … ولا حتى اي نوع شو الي يناسب…
يعني للاستخدام اليوم اي نوع يناسب؟؟؟ وللمناسبات اي نوع يناسب…
الاستخدام اليومي احسن شي الاي شادو العادي ويكون مات ما فيه لمعه
انا عندي في البيت شدو مال ماك علية ال15 لون … بس ماعرف اي نوع يعتبر..
ماك البلته ام 15 لون انتي تختارين الالوان وتعبينها فيها
شوفي انا عندي بلته حطيت فيها كل الالوان الطبيعيه الي هي درجات البني والوان الهايلات الابيض والبيج والوردي الفااتح الزهري وهاي تنفع لكل يوم
اما للعروس خلي قوم بن ناي وكريولاين وحتى ماك بس الالوان تكون ثقيله وقوية لو تدورين في مواضيعي عندي وايد دروس عن كيف تحطين لوك طبيعي وكيف تسوي لوكات ثقيله للعروس دوري فيها ان شالله بتستفادين منها
ثاني سؤال…..
بخصوص الكحل…. اي نوع يناسب لداخل العين اكثر ؟؟؟؟؟ اعقد قلتي الكريمي صح؟؟؟
ايه وكحل ريفيلون الاسود توي راده من لايف ستايل خذت لي اثنين ^_^
اوكي ولفوق العين؟ استخدم ايلينر سائل… والا كحل كريمي والا قلم…؟؟
كلهم ينفعوا انا استخدمهم كلهم فوق العين
وبخصوص الماركات… وين اقدر احصل الماركات هذي:
واي اكس و برستيج:برجوا::NYX محلات لايف ستايل بكل الامارات والا في الصيدليات برا الدولة
اوفيس: فورايفر52: هذول يبعونهم هني من المنتدى انا خذتهم والا تحصلينهم في المعارض الي يسوونها عندنا بالامارات ما اعتقد موجوده برا الدولة مالج الا برومانسيه احلى اسعار عندها
:
ميكاب ستينشن: عندهم المحل في الوحده مول في ابوظبي وهني يبيعونها بعد بالمنتدى
بن ناي: بكل مكان هالماركه بالمنتدى في ناس يبيعونها اذا برا الدولة اطلبيها من النت ارخص بوااااااايد عن هني وايد مواقع يبيعونها
كريولاين: اطلبيها من النت وبس لانه هني يبيعونها ب 4 اضعاف السعر الي تحصلينه على النت
الأكواكلر: Aqua color هذول كوليكشن من كريولان اسمها اكوا يعني مائي وكلر يعني الوان وهذول الي اقصدهم الاي شادوات المائية من كريولاين
كوستال سينتس: من النت من موقعهم اكتبيه في قوقل وبيطلع لج
فيراروتشي: من المعارض انا خذتها من محل مكياج يبيع هالشغلات مال المعارض
راج باني راج: من لايف ستايل والا الصيدليات في برا البلاد
ماكس فاكتور: لايف ستايل والا الصيدليات في برا البلاد
نارس: سيفورا
ريفوليون: لايف ستايل والا الصيدليات في برا البلاد
ادري اسال وايد … لكن انا ماعندي خبرة كااافية بالمكياج… خصوصا اني بنت وحده وماعندي خوات يعلموني
افا عليج احنا خواتج واحنا نساعدج افا بس ما يستوي تقولين ما عندج خوات واحنا وين رحنا ولا يهمج احنا نعين ونعاون وان شالله الله بيساعدنا وايسسر امورنا مثل ما نساعد الغير وانيسر عليهم امور وايد ^_^
دعواتج لي بالتوفيق والله يتمم لج على خير
هني موضوع عن البلتات وكيف اشيل الاي شادوات الي بعلب واحطهم في البلته مثل ما قلت لج افضل وايد البلتات
http://forum.uaewomen.net/showthread.php?t=668489
ان شالله تستفادين منه
ما شاء الله عليج يا علوه
كفيتي و وفيتي
بالنسبه لبودرات ماك …بتودعونها قريب مع ماركة يديده بتنزل وتغطيتها اروع من بودرة ستوديو فكس
ما شاء الله عليج يا علووه
كفيتي و وفيتي ^.^
ربيي يوفقج ان شاءالله
انا بستخدم ديور الفاوندرشن وايد زين
زين نستفيد من أهل الخبره
مشكورة صاحبة الموضوع
المشاركة الأصلية كتبت بواسطة فولك دبي 
كفيتي و وفيتي
بالنسبه لبودرات ماك …بتودعونها قريب مع ماركة يديده بتنزل وتغطيتها اروع من بودرة ستوديو فكس
شو هالماركه فديتج ؟؟