السلام عليكم خواتي اشحالكم 
عساكم طيبين ..
اليوم ولاول مره بكتب موضوع يخص اختي بالرضاعه …وايد احبها واعزها …بطرح لكم مشكلتها واتمنى تنحل او نصيحه او اي شي اقدر اوصل لها اياه …
اولا هي بنت عرب وناس وحبت ريال من عرب وناس والعايلتين معروفين …بغته وبغاها وحاول ويا اهله ياخذها ومارضوا بحجة انه يرمسها بالفون معناته على قولتهم قوية عين ومب متربيه ..وبعد كانوا يبونه ياخذ بنت عمه …المهم الريال قال يا هيه ولا فلا … وبالفعل ملج عليها وسوالها عرس وخذاها وكملوا 13 سنه وعندها منه 3 اولاد وبنت ..ولين يومكم اهل الريال مايرمسونها ولا يعترفون فيها …بس ولدهم الي هوه ريلها يرمسونه ويحبونه ومايرضون فيه لانه ولدهم
بس شو ذنب عيالها الاولاد والبنت ..شي يعور القلب …اهله لين يومكم رافضينها ..لين يومكم مايرمسونها ولا معترفين فيها
لاحول ولاقوة الا بالله …مره قالت لي انا بتطلق والي فيها فيها وباخذ عيالي ..قلت لها عشان ماقبلوا فيج بتهدمين بيتج ..الله يعوضج خير في عيالج وتشوفينهم ريايل ويفرحون قلبج …
المهم خواتي الكريمات شو نصيحتكم لها ..الحرمه بتكمل هالسنه 14 سنه من خذت الريال …الله المستعان 
١٤ سنة ما رضوا ؟!؟!
ليش ان شاء الله أحسن عنها مثلا
برايهم اختي هي شو تبغى بهم
افتكت من عوار الرأس
لا حدبيقول حرمتك قالت و إلا حرمتك سوت ولا هم يحزنون
هي عليها من ريلها و عيالها و ليش تتطلق ما في سبب مقنع أصلا و جان ما خذته
من البداية هب عقب هال سنين تقول بتطلق
صادقه يا اختي ونحن قلنالها هالكلام وهي تحب ريلها وايد …بس استغرب من الناس الي جذي
الله يفرج همها
بللللل 14 سنة حرام
اصلا تدرين بقولج عقب العشرة اهل الريال يعزون مرت ولدهم لان لو ماخذين عنها فكرة بيجوفون اسلوبها
بس دام هم جي بعد شو تسوي الله كريم و خلها تكون مع الناس الاوكي وياها مثلا حمياتها او حد من اهل ريلها في حالة عمتها و عمها ما يرمسونها يعني تقوي علاقاتها مع اشخاص يحترمونها
و افتكت من عوار الراس لا حد بيقولها طلعتي رحتي رجعتي
شريت لها سويت لحرمتك
بالعكس ولا تفتكر فيهم دام مب مفتكرين فيها
الله يعينها
تحاول ماعليه يمكن بالبداية مابيتقبلونها وبتسمع تجريحات بس اذا تبا ترتاح تحاول تبرز نفسها انها صدق الزوجه المثالية
للولد وانها مريحتنه ترى الاهل يدورون راحت العيال اهم شي حاولي تتوددين لهم وطنشي الكلام اللي تسمعينه واللي يعور القلب ,,, أدي واجبج امام ربج وامام زوجج انج مب مقصرة ويا اهله ,,, سوي اكلات حلوة وديلهم سويلهم عزيمة بالبيت واعزميهم او اهديلهم هدايا باللي يحبون والمناسبات خليج موجوده بكل المناسبات ترى البعد يكبر المشاكل وتزيد
لكن لو انتي قريبة منهم يمكن يعرفونج عدل ويفهمونج صح وتتغير الفكرة اللي براسهم ….
وانا اقولج حاولي وكرري المحاولة افرضي وجودج معاهم عشان العيال لا تحاولين تبتعدين وانا ما اقصد 24 ساعة عندهم
يعني عامليهم نفس ماتعاملين اهلج … واتصلي بام ريلج اهم شي حاولي تكسبينها لان هيه الراس الاكبر
ولاتقولين مافي امل لا حاولي وحتى لو رمسوا عنج عادي الغالية بعد مب خسرانه بتكسبين اجر عند الله والله بيسر امورج …ان شاء الله
قلوبهم سووووووووووودا والعياذ بالله… شو هالقلب الاسود… 14 سنة !!! الحين ولدهم ما خذ شورهم وراح وتزوج اللي يباها ويرمسونه عادي هههههههههههه والبنت اللي مالها خص فيهم عشان وافقت قاطعوها… صدق غباء وشر البلية ما يضحك…
حبيبتي خلاص اصلا هيه عاشت بدونهم 14 سنة يعني الحين شو بيفرق اذا كملت كل حياتها دونهم!!! شو تبا فيهم!! شو محتاية منهم!!… احسن لها.. هذا نحن مجابلين اهل رياييلنا وكل يوم يسوون لنا مشكلة… لولا الملامة وعشان خاطر الريل جان فضلنا القطيعة بدال عوار الراس…
اذا هيه تفكر بعيالها وكيف ما يعرفون عمامهم ويدتهم ويدهم من طرف ابوهم.. صح معاها حق.. وخاصة انه اليهال ممكن يسألون.. بس يوم بيكبرون لا تجذب عليهم.. خلها تصارحهم باللي صار بدون ما تزيد ولا تبث الحقد والضغينة بقلب عيالها عليهم… وتكثر من الدعاء وسبحان الله يمكن الله يغير حالها للأحسن.. على الاقل يرضون يتعرفون بعيالها.. والا هيه اريح لها .. البعد احسن…