هلا أخواتي عضوات سيدات الإمارات…
بما أن مناسبه عيد الاتحاد قربت .. وكل يالس يجهز ويعدل لهذا اليوم..
من معلمات وطالبات وأمهات وأطفال<<<< الكل مرتبش 
شو رايكم كل وحده تسوي فكره لهذا اليوم تنزلها في المنتدى..
يعني مثلا توزيعات.. حفلات.. عروض.. مجسمات..
كل أم .. ومعلمه شاركت بشي في هذ اليوم.. تقولنا عشان نتساعد ونتبادل الخبرات..
أنا ببدأ..
أنا متدربه في روضه.. ومطلوب منا نسوي حفله خلال فترة تدريبنا..
طبعا إحنا اخترنا مناسبه العيد الوطني… بيكون شي حيوي ممتع للأطفال والمعلمات..
ما بطول عليكم بقولكم شو سوينا بس نحن بعدنا في التجهيزات يعني ما خلصنا شغل..
سوينا ديكور شعبي.. علقنا خيش على الجدران.. وأشياء تراثيه..
في طرف ثاني حطينا عريش مصغر.. وبعد حطينا فيه تجهيزاته..
وتعرفون انتوا الديكور الشعبي كيف يكون..
وبنسوي زوايا بتكون في أشغال يدويه يعني مثلا الأطفال يصنعون بروشات بعلم الإمارات..
أشغال يدويه .. وبنسوي رقصات شعبيه .. يعني مثل هذه الأفكار …
شو رايكم؟؟
يالله يا بنات همتكم معايه في تبادل الأفكار والخبرات…
وإلي عندها صور بيكون أفضل عن الكلام..
في الإنتظار..
أفااااااأ يا سيدات الإمارات ماهقيتكن جيه..
دشن ولا تحطن حتى رد بسيط…
حتى كلمة شكر ماشي…
أفأ.. أفأ.. أفأ..
يالله ياخبيرات ساعدوها
ان شاء الله الخوات يساعدونج ..
ما اقدر افيدج حبوبه .. السموحه ..
انا اقول لو تسون وسيلة عوووده يعني ممر كامل كله وسايل ملصقه وتخلووون اليهال يرسمون شي عن العيد الوطني او يكتبون..
والشي الثاني خريطة دولتنا تكون عوووده ويبصمون كلهم بألوان العلم وتكتبون تحت (وطني انا .. انا وطني)
وسوي توزيعات عيبتي توزيعات اسراار جوفيها فنيان وحاطه فيه باتشي او حلوى او ترومين تغيرين وتحطين تمر بيكووون روووعه..
سووا مسابقة احلى لبس للبنات وطرشوا للاهل عسب يكشخونهم عدل وعقب عطوهم كلهم هدايا عسب محد يزعل واحلى زي بتكون هديتها اكبر شوي..
وطبعا تمثيلية صغيرونه وحد يشل شله وقصيده..
ولاتنسين الشباب سووا تمثيله عن ايام الغوص وخلهم يلبسون وزار مال اول وغير الموسيقى مال اول..
ان شالله كفيت ووفيت
واذا تبين افكار اكثر نحن حاظرين
والسموحه
ليش ما اتكون من ضمن الفعاليات دكان جديم
اتبيعون فيه حلويات جديمه وباسعار رمزيه مع اشويه ديكور جديم احس الفكره وايد حلوه
لووو عندي جان ماقصرت وياج