السلام عليكم ورحمة الله وبركاته
خواتي ممكن مساعدتكم بأفكار لعبايه الراس
ممكن ترسمون لو في مجال عشان الفكرة توصل صح والكل يستفيد
بهذي الشروط …..
-تكون عباية مسكرة
-تثبت من الراس مثلا بلاستيك
-تناسب الرضاعه مثلا ازرار
-يكون معاها طبقات غشوة مخيطه فيها
وانا عارفة انو عباية الراس تكون وسيعه طبيعي لان مافيها اكمام
والعبايه االي تكون مع اكمام شكلها كثير مو حلو تعطي شكل للجسم
طيب كيف نقدر نسوي اكمام بسيطه للعبايه بحيث ماتكون وسيعه العبايه كثير اتمنى فهمتو علي.. كيف ناخذ القياس
شوو رايكو؟
وشو اافضل قطعة للعباية وللغشوه عشان ما تزلق؟
ورجاء
ما ابي افكار لعباية الكتف ابدا .. راح اتجاهلها👎
حفظكم الله
انا شفت حريم مسويات مالت راس وجيه مسكره كامل بس فتحه للوجه
ومتغشيات بشيله يمكن لانه داخل
تقدرين تسوينها جي وتفصلين فيها غشوه
تقريبا شرات الصوره وترومين ماتخلينها جيه واسعه من عند الكم تضيقينها شوي لين الكوع وبعدها واسعه
وعليكم السلام و رحمة الله و بركاته
بسم الله الرحمن الرحيم
دخلت على عمر بن الخطاب أمة قد كان يعرفها لبعض المهاجرين أو الأنصار وعليها جلباب متقنعة به فسألها عتقت قالت لا قال فما بال الجلباب ضعيه عن رأسك إنما الجلباب على الحرائر من نساء المؤمنين فتلكأت فقام إليها بالدرة فضرب بها رأسها حتى ألقته عن رأسها
الراوي: أنس بن مالك المحدث: الألباني – المصدر: إرواء الغليل – لصفحة أو الرقم: 6/204
خلاصة حكم المحدث: صحيح على شرط مسلم
أنا عبيي مسوتنهم بين الصورة الاولى والثانية اللي حاطتنهم الاخت ميمية
الصورة الثانية اشوفها كريهة الصراحة، لو تروحين السعودية بتشوفين كيف منتشرة بشكل ملفت كأنهن لابسات العباة غصب عنهن مب للستر ومن نفسهن
تكون عند الباط ضيقة لدرجة تبين حجم الصدر!!!!
لو نزلت العباه على الكتف وخلت عباتها وغطوتها واسعة كان أبرك وأستر
مشكوريييين
اتريا ردود باقي الخوات
وان شاء الله يجاوبوني على اسئلتي
القياسات تنأخذ بهذي الطريقة
من خط الشعر أعلى الجبهة نازل لين الأرض ( من الأمام ) قياس طول العباه من جدام
من نفس النقطة من خط الشعر اعلى الجبهة بس على ورا لين الأرض (من الخلف ) طول العباه من الخلف
ومن نفس النقطة أعلى الجبهة عند خط الشعر تنزلين لين الكتف (جهة يمين أو يسار ) و لين فوق الساعة هذا طول الكم
"فتحة الرقبة" اللي بتحطينها على الراس، اللي يحطون فيها اسم المحل من الداخل، تنأخذ من الصدغ يمين نفس مستوى العين وترتفعين وتنزلين مثل التاج النازل لين الصدغ اليسار نفس مستوى العين توقفين
طبعاً أنا أفصلها مسكرة أستر و أرتب، لأن لو مفتوحة نفس عباة الراس الأصلية من يضرب الهوى تطير العباه ويبين اللي تحت وخاصة لو ضارب الهوى بقو تبين الوحدة كأنها لابسة سترج كل شي مفصّل.. الله يستر على المسلمات اللي يبن الستر دنيا و آخرة
فتحة الرقبة مسوتنها على شكل مثلث في اللبس أرتب
واذا ترضعين كيف تاخذين قياس الفتحة؟!
تاخذين متر القياس وتقايسين من عند النقطة اللي بين الرقبة والكتف وتنزلين لين وسط الصدر ومستوى أسفل الصدر
بالنسبة للقصة على الجانب الخط من فتحة الكم لين الأرض تكون على شكل قوس خفيف (انحناء خفيف)
وبعد التفصيل تضبطين الجانبين تحت عشان مايسحب في الارض من اليمين واليسار
وبعد مسوية خاتم للإبهام بس مخفي والكم افصله طويل مستوى مفصل الابهام
أحاول أصور لج اليوم وأنزله هني
وضع العباة على خط شعر الجبهة يخليها ثابتة وماتحتاجين لاستيك
انا البس تحت العباه شيلة ونقاب
والنقاب اطلعه من فتحة المثلث برع يصير شكله أرتب و أستر لمنطقة الصدر
بالنسبة للقماش عندي حرير لامع سميك و حرير لامع خفيف و ندى
بس الحرير أفخم طبعاً
أنا نقابي نفسه فيه غشوة طبقة وحدة غالباً اردها على ورا وفوقها احط العباه
لأني أسوق و بعد لوقت التسوق
غير جذي وخاصة لو مع ريلي في اماكن ثانية غير السوق أنزل طبقة الغشوة مالت النقاب على عيني وبعد اخليها برع العباه مع النقاب شكل ارتب واستر
نوع قماش الشيلة والنقاب نفس الشي بس ناسية اسمه بس هو نفس القماش اللي يستخدمونه لمعظم الشيل في محلات العبي