انا الحمد الله كانت نسبتي في الثانوية 85,8
بس في الجامعة انطردت منها بسبة المعدل من سنتين ونص انطردت من الجامعة ولين الحين احس اني منقهرة اغلب ربيعاتي تخرجن اوبيتخرجن شهر 6 وفيه منهم مش شاطرات وايد نسبهم في السبعين وكملوا وانا نسبتي في الثمانين ولا كملت وفي بعد بنات كانن يرسبن في المدرسة وكملن الجامعة
وبعد اعرف وايد بنات ميح في الانجليزي ويابن مستوى زيرو ومع ذلك كملن
ليش خلوا قانون اللي ايب اقل من معدل 2 طرد ليش مايخلون 1.5 او حتى 1 مش كل الطلبة فنفس المستوى انا اعرف انه هذا قانون دولي ويطبق في اغلب جامعات العالم بس ليش مايراعون الطلبة اللي مستوياتهم متدنية بدال مايطردونهم ليش مايخلونه يكمل عادي واذا رسب فمادة يخلونه يعيدها يلين ينجح هذا كله من الاجانب هم اللي اخترعوا هذا النظام ونحن نقلدهم
امممم
انتي تكلمين عن جامعة الإمارات صح؟ لأنه هاي قوانينهاا
حبيبتي الجامعه مب صعبه اللي يدرس أول بأول ويهتم صدقيني بيمشي
بس اللي مايدرس ويخلي كل شي يتراكم عليه لين وقت الإمتحان ومايسوي البحوث والبرجكتات لازم انه مابيقدر يمشي
حبيبتي … انت ليش ماكنتي تشدين على عمرج وتدرسين ؟؟
يمكن كانت طريقتج في دراسة غلط؟ ليش ماسالتي ربعج كيف تفهمون وكيف تدرسون
لان ماشاء الله نسبتج عالية .؟؟؟
وعلى فكرة الي يسير الجامعة لازم شخصيته تتغير … اما للاسوء او للاحسن
ولا تنقهرين من شي صار وانتهى
حاولي تفكيرين بطريقة اجابية للموضوع …. حاولي تلاقين عمرج في مجال ثاني
لازم في كل انسان نقاط قوة … دوري عليها وبتلاقينها ان شاء الله
وكل واحد يآخذ نصيبه من هالدنيا … لا تحقدين على حد وخلج واثقة من عمرج …
وحاولي تكونين متفائلة وتدورين على شي الاحسن
هب شرط النسبة تحدد مستواج الجامعي…انتي قدراتج وتفوقج الدراسي اكثر منهم وهم تفوقهم الجامعي اكبر ..وبعدين حسب…الانجليزي كنا بالحظ ينجحونا..والحين يلعبوون لعب فالبنات ويرسبونهم قصد…طرق تنفييييييير
صدقج والله
الله يعين يا اختي
نحن عدنا في الكليه كان اللي يرسب الفصل الثاني في أي ماده ياخذ سمر سكوول >>> عباره عن امتحانات اون لاين واذا نجح خلاص يعدي للسنه الثانيه
بس ألحين لا اذا رسب خلاص طرد 
الله يعينا على هالشهاده اللي بناخذها
ماتعرفين ..ترا الدنيا رزق….ويتوزع يمكن رزقج مب فالشهادة يمكن فالعرس وكل وحدة تاخذ رزقها والله هو العالم بمصالحنا….فلا تزعلين لو ما كان مكتوب ما كان بيصير….يمكن الله رزقج بشي اكبر عن الشهادة..يمكن ريعاتج عندهم الشهادة بس ماشي راحة…شو الاهم؟؟ويتمنون يكونون مكانج ..وبالتوفيق
فديتج ترا اللي اقل عن نسبتج في الثانويه نجح و اتخرج من الجامعه .. المشكله مب في نظام المعدل .. المشكله فيج حبوبه .. انتي شكلج ما تركزين على دراستج عدل .. ردي نظمي وقتج فديتج .. والله يوفقج ^_^