مرحبا يا حلوات
اشرايكم نستعرض هنيه تجاربنا مع الخلطات اللي قاعدين انطبقها على الجسم والبشرة ونشوف اشكثر استفدنا منها.
أبتدي بنفسي .. الفترة هذي بما إن الجو كله حرارة وجفاف وخصوصاً في العين لازم يومياً أستخدم أي قناع طبيعي .. مثلاً أمس بالليل سويت سكراب مكون من السكر وعصير البرتقال وقشرت ويهي وعقب غسلته ونشفته .. وحطيت شرائح رفيعة جداً من الخيار وانسدحت عسب لا يطيح الخيار ع الأرض خخخخ .. غسلت ويهي ومسحت فوقه مكعب ثلج عبارة عن ماي عادي مع ماي ورد .. وعقب دهنته بطشووونة زيت زيتون .. اليوم تقول اختي وااااااو .. شو حاطة ع ويهج متفتحة ونضارة.
من يومين استخدمت قناع السدر والكركم مع الروب وزدت عليهم نقطتين عصير لومي .. حسيت عقب ما غسلت ويهي ومسحت عليه مكعب الثلج اللي بماي الورد بانتعاااش .. في منطقة الذقن كانت عندي شوووية حبوب والمفاجأة إنها اختفت عقب استخدام هالخلطة وخدودي توردت حتى إني خفت قلت يمكن اتحسست بس التورد طبيعي!!
أما عيوني .. كنت أكحلهم في كل أسبوع مرة وقبل لا أرقد بعسل طبيعي .. مضمون إنه طبيعي لنه الخلية كانت في بيتنا ونحن لهفناها خخخخخخ
طبعاً النتيجة بريييييييييق رائع .. اتقولين حاطة عدسات .. حتى الرموش تتغذى من العسل.
ما أنصح استخدامه لضعاف القلوب لنه يحرق وتدمع العيون بس معروف العسل فوايده للعيون وكيف يحليها ويقوي النظر.
***
شعري من النوع الجاف .. قبل لا أتسبح أدهنه بزيت للشعر وأسوي مساج للفروة .. وعقب السبوح أستخدم شامبو صانسيلك للشعر الجاف .. وعقب بلسم .. ومرات حمام زيت .. ما أسشور شعري إلا للضرورة .. أخليه ينشف عقب ما أنشفه .. وأستخدم سيروم وأقص أطرافه حوالي 2 سم مرة كل شهرين .. والنتيجة ما أعاني من تساقط الشعر وشعري قاعد يطول لني ناوية أطوله بما إني مليت من الشعر القصير.
هاليومين باستخدم ماسك طبيعي لشعري وبخبركم إذا النتيجة حلوة.
***
يومياً أشرب ليترين ماي أو أكثر + وآكل سلطة فواكه لني ما أحب آكل الفواكه جي من غير شي .. وتقريباً كل ليلة ما أتعشى غير سلطات وبالذات التبولة .. إدماااان .. والنتيجة بشرتي خالية من الشوائب وصارت أكثر إشرااااق من قبل.
أحاول ألعب رياضة يومياً بس لني ضعيفة أخاف أختفي .. عسب جي ما ألعب إلا يوم أحس بجسمي مترهل .. يعني في الأسبوع مرتين إلى ثلاث والحمد لله جسمي مشدود ولا فيني كرشة وهذا أهم شي خخخخخخخخ
راح أكمل الباجي عقب وخصوصاً وصفات البشرة والجسم وغيرها .. بس الحين دوركم تعطونا تجاربكم المميزة واللي طبقتوها ونجحت.
يالله همتكم معاي.
للرفع..
انا جربت خلطات وعجبتني خلطه الكركم بالجلوسيد تبيض
1/ خميره + ماي ورد
2/ شوفان + ليمون + حليب بودره + ماي ورد
3/ والحين بستخدم خلطـه أثار حب الشباب
ملح + زيت زيتون
4/ روب
5/ قطع ماي ورد مثلج
6/ شاي و خيار حق عيوني
اممممممم ماخليت خلطه إلا وجربتهـا *_*
بنات فيه خلطة راح أسويها باجر لنفخ الخدود وقلت أخبركم عليها قبل 
أنا طلبت من الخدامة تجمع لي قشر البيض وبعد ما جمعت عدد معين .. سلقت القشر مع كمية من الملح في ماي نظيف على النار لمدة ساعة .. وذلك للتخلص من الشوائب والأوساخ ولون الختم التجاري خخخخخ
عقب حطيتهم في سلك عسب ينشفون من الماي .. وباجر شوفوا شو بسوي
أطحن قشر البيض طحن ناااااااااااااااعم
أطحن شوية حبة سودا طحن ناعم أيضاً
أخلط قشر البيض مع الحبة السودا .. وأضيف عليهم علبة صغيرة روب + ملعقة عسل طبيعي + ملعقة زيت زيتون.
أحط الخلطة هاي في علبة وأحفظها في الثلاجة وأستخدمها يومياً.
فائدة هالقناع إنه ينشط الكولاجين اللي ينفخ الويه .. والكولاجين ينشط بالكالسيوم والفوسفات وهذا اللي يستخدم في عمليات التجميل .. ومعروف إنه قشر البيض غني جداً بالكالسيوم .. والروب غني بالفوسفات.
والحبة السودا والعسل منجم من المعادن الطبيعية المغذية للبشرة.
الخلطة هذي بتكون قيد التجربة وان شاء الله يوم بجرب بخبركن بالنتايج الطيبة
بالتوفيق للجميع ويزاكم الله خير بعض هاي الخلطات مجربتنها ومثل ما قلتوا نتايجها جدا حلوه