بنات انا اشتغل من 4 سنوات وخلاص كرهت الشغل وابا اطلع احس اني مقيده وايده بالشغل مب قادره اوفق بين بيتي وعيالي ودراستهم ، مب قادره اروح اسأل عن عيالي بمدارسهم ..
كل ما استخير اقدم استقالتي بس الرئيس يرفضها وتميت على هالحال 3 مرات اقدم وهو يرفض مع اني اكون مصلية الاستخاره وانا صح اني محتاره بس تقريبا 85% انا ما ابا الوظيفه …
ربيعاتي يقولوا لي ان ربي مب كاتب لي اني اطلع واني الافضل اني اتم بشغلي ، بس انا وايد متضايقه مب مرتاحه …
انا ما ابا حد يقول لي تمي بوظيفتج ولا طلعي بس الشي اللي ابي اعرفه هل رفض الرئيس للاستقالة هو خيار رب العالمين ام شي ثاني وهل الضيق اللي فيني من الاستخارة ولا لا …
ما عندي حد ثاني اسأله فقلت بسألكم انتوا خواتي …
فديتج ف معلومات ناقصه بكلامج ، شو طبيعه شغلج وليه مب مرتاحه ..
عشان نقدر نساعدج اكثر ^^
مادري الصراحة … لكن اذا هالشي ياثر على مصلحة عيالج وفيه تعب المفروض تحاولين اكثر وتشرحين للمدير ..
هلا خواتي ، انا اشتغل بدائرة حكوميه والحمد الله ادارتي وايد متفاهمه وياي وطبيعة شغلي مب متعبه يعني الحمد الله من ناحية الشغل انا مرتاحه بس اللي انا اللي مب حابته في الوظيفه التقييد انا كنت قبل ما اتعين اوصل عيالي مدارسهم وتقريباً كل اسبوع اسأل عنهم والحمد الله كنت مهتمه فيهم وبواجباتهم اما من اشتغلت استوا العكس صرت ما اسير مدارسهم وما اسأل عنهم لاني ما عندي فرصة وتعرفوا الاستئذان محدود بالشهر يعني على شو بلحق على مدارس البنات ولا الاولاد ولا مراجعاتي بالمستشفى ، وغير هذا من ارد من الدوام اكون مرهقه وابا اريح وما اقدر على المراجعه حق عيالي والعصر ابا اريح شوي اطلع اتمشى … وغير هذا ريلي ابداً ما يشجعني على الشغل يقول تعب وارهاق على الحرمه والحرمه افضل لها تتابع عيالها … فمن جيه احس بتوتر وهناك ما ابا اخسر وظيفتي لاني بصعوبه حصلتها واخاف اطلع واندم ..
مع اني من اخذ اجازة ارتاح نفسياً وما ودي ارد للشغل … 
اذا انتي بحاجه الماده اللي تاخذينها من الشغل .. مانصحج تستقيلين
لكن اذا الحمدلله مب بحاجتها وايد ، ف انصحج تعيشين حياتج مع عيالج لان هالفتره مابتكرر بعدين
وبعدج عنهم ممكن ياثر بحياتهم وقرارتهم .. يعني باختصار تكونين ام بالاسم فقط .
موفقه عزيزتي
دامج مب مرتاحه وتبين تطلعين معناته لازم تحاولين تطلعين من الوظيفه وبتحسين بالراحه ان شاءالله ترا الاستخاره تقدم اللي فيه الخير لج وانا اشوف ان البيت والعيال اهم من اي شي ثاني واذا انتي مب محتاجه للراتب وريلج رايه انج تستقيلين فالافضل لج الاستقاااله طبعا وتهني بعيالج وبيتج وربي يوفقج
اختي انا كنت أداوم بس استقلت لسببين
الاول مثل ما قلتي عن انشغالي وما اقدر اروح مدارس
العيال ولا اقدر ادرسهم هذا وانا حاطتهم في مدارس
خاصة يشدون بالواجبات وباللغة الانجليزية ويحتاجون
مراجعه ، وغير هذا احس نفسي انشغلت عن ريلي ما صار
عندي وقت اطلع معاه ولا أسافر صار الجدول كله متخربط
و احس قصرت في حق عيالي وحقه
فقلت تراه مرتاح ماديا فما يحتاج أداوم حاليا
مع انه ممكن أفكر في المستقبل أني ارجع أداوم
بعد ما أوقف أني اييب عيال ويروحون مدارس كلهم
لاني كنت احس نفسي أنجز شيء واتقدم في حياتي
والحين صح اهتم في عائلتي بس ما احس عندي هدف
شخصي ..